მადლიერები ვართ საქართველოს მიერ ნატოს სხვადასხვა მისიასა და ოპერაციაში შეტანილი წვლილისთვის. რამდენიმე სფეროში საქართველოს მიერ მიღწეულ პროგრესს ვხედავთ, თუმცა, არის მიმართულებები სადაც ჯერ არასაკმარისი წინსვლაა, – ამის შესახებ ნატოს გენერალურმა მდივანმა, იენს სტოლტენბერგმა „ქრონიკასთან“ ინტერვიუში განაცხადა.
მისი თქმით, ნატოს კარი ღიაა, თუმცა გასათვალისწინებელია ისიც, რომ ალიანსში გაწევრიანებისთვის 32 წევრი სახელმწიფოს კონსენსუსია საჭირო.
„მივესალმებით იმ ფაქტს, რომ ახლა საქართველოსთვის ნატოში გაწევრიანების გზას განამტკიცებს ევროკავშირის კანდიდატის სტატუსი. კონკრეტული ვადები არ მაქვს, ეს არის პროცესი, რომელიც ნაწილობრივ ეფუძნება რეფორმების განხორციელებას. უნდა გავითვალისწინოთ, რომ საქართველოს წევრობისთვის 32 წევრი სახელმწიფოს კონსენსუსია საჭირო, თუმცა ნატოს კარი ღიაა. იმ 10 წლის განმავლობაში, რაც მე ვარ გენერალური მდივანი, ნატო 4-ჯერ გაფართოვდა“, – აღნიშნა სტოლტენბერგმა.