ჩვენ ამ კვირაში დავაინიცირებთ კანონპროექტს ლგბტ პროპაგანდის წინააღმდეგ. როგორც იცით, ამ თემით ჩვენი ოპონენტები უკვე დაინტერესდნენ და ემზადებიან ჯერ კიდევ დაურეგისტრირებელი კანონპროექტის წინააღმდეგ საბრძოლველად, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ უმრავლესობის სხდომის დასრულების შემდეგ განაცხადა.
მისი თქმით, „თბილისი პრაიდის“ ორგანიზებით ჩატარებულ ტრენინგებზე, რომელიც გაეროს განვითარების ფონდმა დააფინანსა, ფსევდოლიბერალური პროპაგანდის დაცვაზე იმსჯელეს. მდინარაძე გაეროს განვითარების ფონდს, ასევე, სხვა ორგანიზაციებს მოუწოდებს, კარგად გაერკვნენ რეალურად რა აქტივობებს აფინანსებენ.
„ტრენინგები ჩატარდა „თბილისი პრაიდის“ ორგანიზებით და გაეროს განვითარების ფონდის დაფინანსებით, რაზეც პრაიდის წარმომადგენლები აცხადებენ, რომ რუსული დეზინფორმაციის წინააღმდეგ ტარდებოდა სემინარი, ხოლო გაეროს განვითარების ფონდმა თქვა, რომ მათ დააფინანსეს სემინარი, რომელიც უმცირესობების უფლებებს ეხებოდა. სინამდვილეში კი, არა უფლებები, არამედ სასაუბრო თემა ფსევდოლიბერალური პროპაგანდის დაცვა გახლდათ და ამის შესახებ ინფორმაცია ჟურნალისტებისგან წინასწარ გახმოვანდა. მოვუწოდებთ როგორც გაეროს განვითარების ფონდს, ასევე, სხვა ორგანიზაციებს, კარგად გაერკვნენ რეალურად რა აქტივობებს აფინანსებენ და რაში იხარჯება ჩვენი მეგობარი, პარტნიორი ქვეყნების გადასახადების გადამხდელთა ფული, იმისთვის, რომ მაგალითად არატრადიციული ცხოვრების წესის მქონე ადამიანების უფლებები არ ავურიოთ ლგბტ პროპაგანდის მავნე შედეგებში; რომ ამერიკული კანონის ზუსტი თარგმანი არ ავურიოთ რუსულ კანონმდებლობაში, დოლარი, რომლითაც მდიდარი ენჯეოები ფინანსდებიან არ ავურიოთ რუბლში, რომლითაც ასევე მდიდარი ენჯეოების ნაწილი ფინანსდება და ა.შ.“, – განაცხადა მდინარაძემ.