უკრაინა შეუძლებელი არჩევანის წინაშე დადგა – ტერიტორიის დათმობა მოქალაქეების სიცოცხლის გადასარჩენად, თუ ტერიტორიისთვის ბრძოლა, ჯარისკაცების სიცოცხლის ფასად, – წერს ამერიკული გაზეთი The Wall Street Journal-ი სტატიაში სათაურით უკრაინის შეუძლებელი არჩევანი: ტერიტორიის ან სიცოცხლის დათმობა.
“უკრაინის ლიდერები აცხადებენ, რომ ტერიტორიის ყოველი სანტიმეტრი ბრძოლად ღირს, მაგრამ მათი არმია გამოფიტულია გასულ წელს წარუმატებელი კონტრშეტევის შემდეგ, ხოლო დამატებითი დახმარების პაკეტი შეჩერებულია კონგრესში. რუსეთი, დიდი არმიით და სამხედრო ეკონომიკით, ზეწოლას ახდენს თავის მეზობელზე”, – აღნიშნულია სტატიაში.
სტატიის ავტორები აღნიშნავენ, რომ წელს უკრაინას მხოლოდ თავდაცვაში ყოფნა მოუწევს, რათა შეეცადოს შეზღუდოს ტერიტორიული დანაკარგები აგრესორის სამხედრო უპირატესობის ფონზე.
სტატიაში აღნიშნულია, რომ უკრაინას დრო სჭირდება საკუთარი ძალების აღსადგენად, რათა დაიბრუნოს რუსეთის მიერ ოკუპირებული ტერიტორიის დაახლოებით 20%.
საბრძოლო მასალის მწვავე დეფიციტის ფონზე, უკრაინის არმია ასევე განიცდის წვევამდელების დეფიციტს, მაგრამ ქვეყნის ხელმძღვანელობა ყოყმანობს მობილიზაციის გამოცხადებაზე, რადგან ეს პოლიტიკურად მგრძნობიარე გადაწყვეტილებაა.