ქართველი ოპოზიციონერებისა და უკრაინის დელეგაციის უარის გამო, საქართველოს, უკრაინისა და მოლდოვის ევროინტეგრაციის შესახებ რეზოლუციას ევრონესტზე ვერ მიიღებენ.
განცხადება მაკა ბოჭორიშვილმა ევროპარლამენტში გააკეთა და ოპონენტები ქვეყნის ინტერესების საზიანოდ მოქმედებაში დაადანაშაულა.
„ევრონესტის საპარლამენტო ასამბლეის ფარგლები, „ქართულ ოცნებას“ ჰქონდა ინიციატივა, რომ დაგვეინიცირებინა რეზოლუცია საქართველოს, უკრაინისა და მოლდოვის ევროპულ პერსპექტივასთან დაკავშირებით, რომელიც მხარს დაუჭერდა კიდევ ერთხელ საქართველოს, უკრაინისა და მოლდოვის ევროკავშირში გაწევრიანებას. ამ რეზოლუციას მხარს უჭერდა მოლდოვის დელეგაცია, თუმცა უკრაინისა და ოპოზიციის წევრების გამო, რომლებმაც ხელი არ მოაწერეს აღნიშნულ ტექსტს, შეუძლებელი გახდა ამ რეზოლუციაზე მუშაობის გაგრძელება, ვინაიდან ვერ მოხდა შესაბამისი რაოდენობის ინიციატორის მიერ ტექსტის დაინიცირება. აქედან გამომდინარე, ევრონესტის პლენარულ სესიაზე მოხდება მხოლოდ იმ რეზოლუციების მიღება, რომელიც ინიცირებულია კომიტეტების მხრიდან და ანგარიშები იქნება წარმოდგენილი“, – განაცხადა პარლამენტის ევროპასთან ინტეგრაციის კომიტეტის თავმჯდომარემ ჟურნალისტებთან.