ვინც საქართველოს აბრალებს, რომ ის ეხმარება რუსეთს სანქციებისთვის თავის არიდებაში, ის არის საქართველოს მტერი. პირდაპირ დავარქვათ თავისი სახელი, – ამის შესახებ მამუკა მდინარაძემ ჟურნალისტებთან საუბრისას განაცხადა.
საპარლამენტო უმრავლესობის ლიდერმა და „ქართული ოცნების“ აღმასრულებელმა მდივანმა ასეთი საქციელი ქვეყნის ღალატად შეაფასა.
„ვინც კი გვაბრალებს, რომ რუსეთს ვეხმარებით და თან ეს ტყუილია, ის პირდაპირი გაგებით მტრობს საქართველოს. შესაბამისად, რომან გოცირიძე გამოვა პარლამენტის სხდომაზე თუ ერთობლივ განცხადებას გაავრცელებენ „ენჯეო“ სექტორის წარმომადგენლები, ვინც ამას საქართველოს დააბრალებს, რეალობის საწინააღმდეგოდ და მოიტყუება, ყველა მტრობს საქართველოს. ხვალაც და ზეგაც იქნება ასეთი მტრობა. ტელევიზია იქნება ეს, ჟურნალისტი, პარლამენტარი, პოლიტიკოსი, „ენჯეო“ სექტორის წარმომადგენელი – ის მტრობს საქართველოს. როგორ შეიძლება საკუთარ სამშობლოს აბრალებდე ოკუპანტი ქვეყნის სასარგებლო მოქმედებას, როდესაც რეალობისგან ეს აბსოლუტურად შორს არის.
როდესაც სანქციების ჯგუფი ჩამოდის შენს ქვეყანაში, ისინი ძალიან კრიტიკულად განსჯიან ამ ყველაფერს და ამბობენ, რომ საქართველოში ერთი შემთხვევაც არ დაფიქსირებულა, რომ რუსეთს მიხმარებოდა სანქციებისთვის თავის არიდებაში და შენი ქვეყნის რომელიმე წარმომადგენელი ამბობს, რომ საქართველო ეხმარება რუსეთს, ის მტრობს საქართველოს. ღალატს თავისი სახელი უნდა დავარქვათ. ამაზე დიდი ღალატი მართლა ვერ წარმომიდგენია, გულწრფელად გეუბნებით“, – განაცხადა მდინარაძემ.