აშშ-ის ეროვნული უშიშროების საბჭოს სტრატეგიული კომუნიკაციების კოორდინატორმა, ჯონ კირბიმ უარყო რუსეთის ბრალდებები, რომ ტერორისტული თავდასხმა „კროკუს სითი ჰოლის“ საკონცერტო დარბაზზე უკრაინას უკავშირდება და აღნიშნულ ბრალდებებს კრემლის პროპაგანდა უწოდა.
კირბიმ აღნიშნა, რომ მოსკოვის ოლქში განხორციელებულ თავდასხმას არავითარი კავშირი არ აქვს უკრაინასთან.
„ეს იყო „ისლამური სახელმწიფო-ხორასანის“ მიერ მიერ განხორციელებული თავდასხმა. წერტილი“, – განაცხადა ჯონ კირბიმ.
აშშ-ის ვიცე-პრეზიდენტმა, კამალა ჰარისმა განაცხადა, რომ არ არსებობს არანაირი მტკიცებულება, რომელიც ადასტურებს ვლადიმირ პუტინის მტკიცებას, რომ უკრაინა მონაწილეობდა „კროკუს სითი ჰოლის“ საკონცერტო დარბაზში მომხდარ ტერაქტში.
„არა, არ არსებობს არანაირი მტკიცებულება და, ფაქტობრივად, ჩვენ ვიცით, რომ „ისლამური სახელმწიფო“ არის რეალურად პასუხისმგებელი მომხდარზე“, – აღნიშნა აშშ-ის ვიცე-პრეზიდენტმა.