აშშ-ის სახელმწიფო დეპარტამენტში განაცხადეს, რომ პუტინის მოტივაცია უკრაინის დაპყრობასთან დაკავშირებით უცვლელი რჩება, ხოლო კრემლის ნებისმიერი განცხადება სამშვიდობო მოლაპარაკებების შესაძლებლობის შესახებ რეალურად შორს არის რუსეთის რეალური განზრახვებისგან.
„ვლადიმირ პუტინის მოტივები უცვლელია. მას სურს უკრაინის დაპყრობა და უკრაინელი ხალხის დამორჩილება“, – აღნიშნა აშშ-ის სახელმწიფო დეპარტამენტის ოფიციალურმა წარმომადგენელმა, მეთიუ მილერმა.
მეთიუ მილერმა ასევე განაცხადა, რომ კრემლის ლიდერმა ბოლო 10 დღის განმავლობაში დაადასტურა, რომ „მას ახლა უკრაინასთან მოლაპარაკების ინტერესი არ აქვს, რადგან მან დაინახა, რომ უკრაინელები საბრძოლო მასალის დეფიციტს განიცდიან“.
მისი თქმით, ეს მხოლოდ ხაზს უსვამს იმას, რომ შეერთებული შტატების კონგრესმა უნდა დაამტკიცოს პრეზიდენტის მოთხოვნა დამატებითი დაფინანსების თაობაზე და უზრუნველყოს უკრაინა რუსული აგრესიისგან თავის დასაცავად საჭირო იარაღით.