უკრაინის საგარეო საქმეთა სამინისტრომ განაცხადა, რომ შეაჩერა საკონსულო მომსახურება გასაწვევი ასაკის უკრაინელი მამაკაცებისთვის, რომლებმაც ქვეყანა დატოვეს. ინფორმაციას ამის შესახებ ამერიკული გამოცემა The Washington Post-ი ავრცელებს.
როგორც The Washington Post-ი წერს, აღნიშნული ნაბიჯი მათ შესაძლებლობას არ მისცემს, განაახლონ პასპორტები ან მიიღონ სხვა აუცილებელი საკონსულო მომსახურება.
რუსეთის მიერ უკრაინაში ომის დაწყების შემდეგ, ათასობით უკრაინელმა მამაკაცმა ქვეყანა დატოვა, მიუხედავად იმისა, რომ საომარი მდგომარეობა უკრძალავს 18 წელზე უფროსი ასაკის მამაკაცებს საზღვარგარეთ გამგზავრებას.
უკრაინის საგარეო უწყებაში აღნიშნეს, რომ საკონსულო მომსახურების შეზღუდვა შეესაბამება სამხედრო მობილიზაციის შესახებ ახლახან მიღებულ კანონს.
„საზღვარგარეთ ყოფნა არ ათავისუფლებს მოქალაქეს სამშობლოს წინაშე მოვალეობისგან“, – აღნიშნა უკრაინის საგარეო საქმეთა მინისტრმა, დმიტრო კულებამ.