“გაჩერდი მანდ, ხმას ნუღარ უწევ, ნუ მეპასუხები”, – ამ სიტყვებით მიმართა პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა “ნაციონალური მოძრაობის“ თავმჯდომარეს, ლევან ხაბეიშვილს იურიდიულ საკითხთა კომიტეტის სხდომაზე, სადაც „უცხოური გავლენის გამჭვირვალობის“ კანონპროექტის მეორე მოსმენით განხილვა მიმდინარეობს.
ხმაური ხაბეიშვილის კითხვას მოჰყვა, რომლითაც მან უმრავლესობის ლიდერს, მამუკა მდინარაძეს ჰკითხა, ხომ არ იყო კანონის მიღების მიზანი ევროკავშირზე უარის თქმა.
„ბატონო ლევან, სხდომის მიმდინარეობს ხელს უშლით, ამიტომ, გაფრთხილებული ხართ. ნუ საუბრობთ ყველა ერთად, რა გჭირთ?! რატომ საუბრობთ ყველა ერთად, სხდომის ჩაშლა რომ გინდათ, ვიცით, მაგრამ გაჩერდი ერთი წუთი, მოისმინე რა, ხმას ნუღარ უწევ, ნუ მეპასუხები, გაჩერდი. ნუ მესაუბრებით ორ ხმაში, ბოლოჯერ განგიმარტავთ. რისთვის ხარ შემოსული აქ, პროვოკაცია გინდა, ხომ? პროვოკაციისთვის ხარ ხომ, შემოსული? ბოლოჯერ გაფრთხილებთ. მუხლთან დაკავშირებით თუ გაქვთ კითხვა, დასვით, თუ არადა, ჩამოგართმევთ სიტყვას“, – განაცხადა ოხანაშვილმა.