გამჭვირვალობის კანონი არაფერს ითვალისწინებს გარდა ერთი რამისა, რომ ყველას დაფინანსების წყარო და დასაფინანსებელი პროექტები იყოს საჯარო საზოგადოებისთვის და სახელმწიფოსთვის. რა თქმა უნდა, ეს არის სახელმწიფოს და ხალხის ლეგიტიმური უფლება, ეს არის დემოკრატიის შემადგენელი აუცილებელი პირობა, – ამის შესახებ საპროცედურო საკითხთა კომიტეტის თავმჯდომარემ, ირაკლი ქადაგიშვილმა განაცხადა.
„რაც შეეხება შარლ მიშელის სიტყვებს, რომ ჩვენ ნამდვილი დიალოგი უნდა ვაწარმოოთ, ჩვენ ყოველთვის ამ ნამდვილი დიალოგისკენ ვართ მოწოდებულები. იმის გამო, რომ ამ ქვეყანას ჰქონოდა მშვიდობა, სტაბილური განვითარება, დემოკრატია შეუფერხებლად განვითარებულიყო, მათ შორის ბატონი მიშელის შეთავაზებულ პროექტსაც დავეთანხმეთ 2020 წლის არჩევნების შემდეგ. პოლარიზაცია ამან კი არ შეასუსტა, არამედ პირიქით გააძლიერა. ამიტომ თუ არის საუბარი ნამდვილ დიალოგსა და პარტნიორობაზე, სწორედ ეს არის ჩვენი ერთადერთი პირობა და მოთხოვნა“, – აღნიშნა ქადაგიშვილმა.