გია ნოდია პროკურატურის მიერ ციანიდის საქმეზე გავრცელებულ ჩანაწერებს ეხმაურება და ამბობს, რომ დეკანოზ მამალაძის, როგორც სიმართლის მაძიებლის ლეგენდა გარდაიცვალა.
“მამა გიორგი მამალიძის ჩანაწერი ორი მხრიდან შეიძლება განვიხილოთ: რამდენად ძლიერი „ქეისი“ აქვს პროკურატურას, და რა გავიგეთ მამალაძის შესახებ. რაც შეეხება ამ უკანასკნელს, შეიქმნა ძლიერი შთაბეჭდილება, რომ ეს არის სახიფათო ავანტიურისტი, რომელიც ვიღაცის მოსაკლავად საწამლავს ეძებდაკარიერულიო წინსვლის მოტივით. კონკრეტულად ვის მოწამვლას აპირებდა, საინტერესოა, მაგრამ ამ პიროვნების შესაფასებლად გადამწყვეტი არაა. ამ კაცის სიმართლის მაძიებლად და უდანაშაულო მსხვერპლად გამოცხადება, რბილად რომ ვთქვათ, ვერ არის დამაჯერებელი.
მეორე ამბავია, რომ, სამწუხაროდ, პროკურატურის და ზოგადად ხელისუფლების ვერც პროფესიონალიზმის და ვერც კეთილსინდისიერების მიმართ ნდობა ვერ გვექნება. პრემიერის და სხვა თანამდებობის პირების ხმამაღალი განცხადებები, რომ ეროვნული ტრაგედია ავირიდეთ (ანუ პატრიარქს კლავდნენ და გადავარჩინეთ), როცა ბრალი ოფიციალურად შორენა თეთრუაშვილის მკვლელობაზეა წაყენებული, მაინც სასაცილოა, როგორც პოლიტიკური ქულების დაწერას დახარბებული პოლიტიკოსების ამჩატება. აგრეთვე ძალიან უცნაურია, რომ თუ პროკურატურა ამ ადამიანს ყველანაირად უთვალთვალებდა (მოწოდებული მასალებით, სწორადაც იქცეოდა), მაინც ვერ გაიგო, ვისგან რეალურად ვისგან შეიძინა ამ კაცმა ციანიდი, რომელიც ამოუღეს, და ამ კითხვის დასმაც კი არ სიამოვნებს (ცხადია, იფიქრებს ვიღაცა, რომ ბარემ ჩაუდეს).
ხოლო ეკლესიაში რომ ცუდადაა საქმე, ამას მამალაძის კადრები ვერანაირად ვერ შველის. სხვა ამბავია, რომ მამალაძის როგორც სიმართლის მაძიებლის ლეგენდა, როგორც ჩანს, გარდაიცვალა”, – წერს სოციალურ ქსელში გია ნოდია.