“საოცარია რომ გამჭვირვალობას გვისახელებენ როგორც პრორუსულს”

პარლამენტის ვიცესპიკერი, გია ვოლსკი აშშ-ის სახელმწიფო დეპარტამენტის სპიკერის, მეთიუ მილერის განცხადებას გამოეხმაურა.

“საოცარია ის, რომ გამჭვირვალობას გვისახელებენ, როგორც პრორუსულს. ერთადერთი, მთავარი თემა არის ის, რომ პასუხისმგებლობა გქონდეს საზოგადოების წინაშე და ვერ გაუბედო მას ისეთ თემებზე საუბარი, რომელიც, აშკარად, საქართველოს დესტაბილიზაციისკენ მიათრევს, რაც ამათ უნდათ, რომ გააკეთონ. როგორც კი გამჭვირვალობის შესახებ კანონის პრინციპი დაისადგურებს ამის შესაძლებლობა აღარ იქნება. რაც შეეხება სანქციებს, აქ ლაპარაკია იმაზე, რომ ბიძინა ივანიშვილი, რომელიც, არაფორმალურად, დასანქცირებულია, უნდა იცვლიდეს პოზიციას და უნდა დაუპირისპირდეს იმ ინტერესს, რომელიც ჩვენს ერს აქვს და მისი გადარჩენის აუცილებელი პირობაა. პრაქტიკულად, ის, არაფორმალურად, დასანქცირებულია, ვიცით, რომ აქ რამდენიმე მილიარდზეა ლაპარაკი, რომლის უდიდესი ნაწილი, როგორც ხმარდებოდა, ასევე ხმარდება და მომავალშიც გათვალისწინებული იყო საქართველოს საჭიროებებისთვის. ეს საჭიროება არსებობს, მაგრამ თემა არ არის, რომლითაც შეიძლება, ბიძინა ივანიშვილს პოზიცია შეაცვლევინონ”, – განაცხადა ვოლსკიმ.

ცნობისთვის, მეთიუ მილერმა განაცხადა: ,,FARA ეხება იმ ადამიანებს, რომლებიც უცხოური მთავრობების სახელით მოქმედებენ და არა მათ, ვინც ლეგიტიმურ არასამთავრობო ორგანიზაციების საქმიანობას ახორციელებს – წარსულში ეს ცრუ შედარებები მინახავს”.