ია მეტრეველმა „რეპორტიორის” პრესკლუბში გამართულ ბრიფინგზე „რუსთავი 2″-ის საქმეზე ისაუბრა და განაცხადა, რომ იგი შეშფოთებულია სტრასბურგის სასამართლოს ნაჩქარევი გადაწყვეტილებით აღსრულების შეჩერებასთან დაკავშირებით.
„აბსოლუტურად ვეთანხმები უზენაესის სასამართლოს გადაწყვეტილებას „რუსთავი 2″-ის საქმეზე. განაჩენი იყო სამართლიანი. ყველასთვის კარგად არის ცნობილი, რომ „რუსთავი 2″ არის პარტიული ტელევიზია, რომელიც ემსახურება მხოლოდ სიცრუეს და „ნაციონალური მოძრაობის” ბოროტ ზრახვებს. ის არის წართმეული ტელევიზია და ამ შემთხვევაში, მოხდა არხის ნამდვილი მეპატრონის საკუთრებაში დაბრუნება. რაც შეეხება სტრასბურგის მოქმედებას, განცვიფრებული ვარ და არა მარტო მე, საზოგადოების უდიდესი ნაწილი. მაშინ, როცა ქვეყანაში საშინელებები ხდებოდა, მოხდა „იმედის” დარბევა, 26 მაისი, დღემდე ამ საქმეების განხილვაც კი არ დაუწყიათ და ის, რომ ერთ დღეში ასეთ გადაწყვეტილებას იღებს სტრასბურგი, ძალიან დიდ ეჭვებს აჩენს. ეს არის უპრეცედენტო შემთხვევა. მართლაც აღმაშფოთებელი და ჩვენი საზოგადოების, ჩვენი ქვეყნისა და სასამართლოს ღირსების შელახვაა. დღეს მედია თავისუფალია და „რუსთავი 2″-ის მიერ ატეხილი ამბავი, რომ ვითომ სიტყვის თავისუფლებას ართმევენ, არის სრული აბსურდი. ჩვენ არ ვართ ის ერი, რომელიც შეეგუება ღირსების ასე შელახვას, ჩვენ ამას არ მოვითმენთ. საზოგადოებას მივმართავ, რომ ჩვენ ამას პასუხი უნდა გავცეთ!” – განაცხადა ია მეტრეველმა.
მეტრეველის თქმით, „რუსთავი 2″-მა უნდა გაასაჯაროოს ის წერილი, რომელიც სტრასბურგის სასამართლოში გაიგზავნა და რომლის საფუძველზეც მოხდა აღსრულების შეჩერება.
„კარგი იქნება, თუ „რუსთავი 2″ გაასაჯაროებს იმ წერილს, რომელიც სტრასბურგში გაგზავნა. წარმომიდგენია, რა წერია იმ წერილში, რადგან ეს ტელევიზია მთლიანად სიცრუეზეა აგებული და არ გაუჭირდებოდა იქ საშინელებების ჩაწერა”, – აღნიშნა მეტრეველმა.