ისტორიაში პირველად საქართველოს ვაჟ ხელბურთელთა ეროვნული ნაკრები მსოფლიოს ჩემპიონატის საკვალიფიკაციო ეტაპის ფლეი-ოფში ასპარეზობს. ქართველმა ხელბურთელებმა პირველ შეხვედრაში ავსტრიელებს „თბილისის არენაზე“ უმასპინძლეს და დაძაბული მატჩი ანგარიშით 25:27 დათმეს. საპასუხო შეხვედრა 12 მაისს ვენაში გაიმართება და ორი მატჩის შედეგებით გამარჯვებული ნაკრები მსოფლიოს პირველობაზე იასპარეზებს.
მატჩს საქართველოს კულტურისა და სპორტის მინისტრი თეა წულუკიანი, დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე, საქართველოს პარლამენტის სპორტის კომიტეტის თავმჯდომარე ირაკლი მეძმარიაშვილი და ხელბურთის ეროვნული ფედერაციის პრეზიდენტი ვახტანგ მეიფარიანი ესწრებოდნენ.
ეროვნულმა ნაკრებმა მსოფლიოს ჩემპიონატის საკვალიფიკაციო ეტაპის ფლეი-ოფში თამაშის უფლება ევროპის ჩემპიონატზე ასპარეზობის შემდეგ მოიპოვა. შეგახსენებთ, რომ კონტინენტის პირველობაზე ქართველმა ხელბურთელებმა ისტორიაში პირველად იასპარეზეს. გერმანიაში გამართულ ჩემპიონატზე საქართველოს ნაკრებმა პირველი ისტორიული გამარჯვება ბოლო ტურის მატჩში ბოსნია-ჰერცეგოვინას წინააღმდეგ მოიპოვა, ეროვნულმა ნაკრებმა მეტოქეს ანგარიშით 22:19 სძლია.
2025 წლის მსოფლიოს ჩემპიონატს ხელბურთში სამი ქვეყანა – ხორვატია, დანია და ნორვეგია -უმასპინძლებს. კონტინენტის პირველობა მომავალ წელს, 14 იანვრიდან 2 თებერვლის ჩათვლით, გაიმართება.
საქართველოსა და ავსტრიის ნაკრებები ერთმანეთს ხუთჯერ შეხვდნენ. აქედან ერთი მატჩი საქართველოს გამარჯვებით, ოთხი შეხვედრა კი ავსტრიელების მოგებით დასრულდა.
