დღევანდელი დღე სცილდება ერთი რომელიმე მოვლენისა და ინსტიტუციის ფარგლებს. მან გაცილებით დიდი მასშტაბი მიიღო. დღეს ერი და ბერი გაერთიანდა. ეს იყო ძალიან დიდი მსვლელობა, ძალიან დიდი სულიერი მოძრაობა, რომელმაც გამოხატა საზოგადოების უდიდესი ნაწილის სულისკვეთება, – ამის შესახებ მეცნიერმა, ფილოლოგმა, საზოგადოება „ქართულის“ წევრმა ვალერი ასათიანმა „დღის ქრონიკაში“ განაცხადა.
„ლაპარაკი იმის შესახებ, რომ ოჯახი საფუძველთა საფუძველია, ქვაკუთხედია, დედაბოძია ნებისმიერი ერისა და განსაკუთრებით ქართული ტრადიციების მატარებელი საზოგადოების, ახლა ამაზე მრავალსიტყვაობა ნამდვილად არ არის საჭირო, მაგრამ ხაზგასმა იმისა, რაც დღეს მოხდა აუცილებელია საზოგადოებისათვის, იმიტომ რომ ამ გეოპოლიტიკურ ვითარებაში ძალიან დიდ პრობლემებს ვაწყდებით, ძალიან დიდ ხიფათთან გვაქვს საქმე. ამ მოვლენებმა შეიძლება დიდად დააზიანონ ეროვნული ცნობიერება“, – აღნიშნა ვალერი ასათიანმა.
დღეს, ოჯახის სიწმინდისა და მშობლების პატივისცემის დღესთან დაკავშირებით მთელი ქვეყნის მასშტაბით საზეიმო მსვლელობები გაიმართა.