ძალიან ვწუხვარ საქართველოს პარლამენტის დღევანდელი გადაწყვეტილების გამო, დაძლიოს პრეზიდენტის ვეტო და გააგრძელოს კანონის მისი ამჟამინდელი ფორმით საბოლოო დამტკიცება, მიუხედავად საერთაშორისო პარტნიორების კრიტიკისა მის შეუთავსებლობასთან ევროპულ სტანდარტებთან, – განაცხადა ევროპის საბჭოს გენერალურმა მდივანმა, მარია პეიჩინოვიჩ-ბურიჩმა.
„ამ ნაბიჯის გადადგმით, საქართველოს ხელისუფლებამ, სამწუხაროდ, უარი თქვა ამ კანონპროექტის უკან გაწვევის საბოლოო შესაძლებლობასა და მნიშვნელოვან დიალოგზე, უგულებელყო ვენეციის კომისიის ცალსახა რეკომენდაციები, რომლის ავტორიტეტული სამართლებრივი მოსაზრებები ასახავს ჩვენს დემოკრატიულ სტანდარტებს. მე ღრმად ვარ შეშფოთებული კანონის უარყოფითი ზემოქმედებით ინფორმირებულ საჯარო დებატებზე, პლურალიზმზე, დემოკრატიულ კონტროლზე, რამაც, შესაძლოა, საფრთხე შეუქმნას თავისუფალი და სამართლიანი არჩევნების გარემოსაც“, – აღნიშნულია განცხადებაში.
„თანაბრად შემაშფოთებელი რჩება დაშინების, ძალის არაპროპორციული გამოყენებისა და სტიგმატიზაციის ნარატივების აშკარა დაუსჯელობა სამოქალაქო საზოგადოების ორგანიზაციების, სამოქალაქო აქტივისტებისა და მშვიდობიანი მომიტინგეების მიმართ. ეს ქმედებები დაუყოვნებლივ უნდა იქნას გამოძიებული და უფლებების დარღვევაზე პასუხისმგებელი პირები პასუხისგებაში უნდა მიეცნენ ისეთი პრაქტიკის თავიდან ასაცილებლად, რომელსაც ადგილი არ აქვს დემოკრატიულ საზოგადოებაში. ევროპის საბჭო კვლავ სრულ მხარდაჭერას უცხადებს ქართველი ხალხის ევროპულ მისწრაფებებს“, – ნათქვამია განცხადებაში.