აშშ-ის სახელმწიფო მდივანი ენტონი ბლინკენი მოლდოვაში გაემგზავრა. სახელმწიფო დეპარტამენტის ცნობით, ამით ბლინკენმა დაიწყო ევროპული ტურნე, რომელიც მიზნად ისახავს, გააძლიეროს დასავლეთის მხარდაჭერა უკრაინის მიმართ ნატო-ს მოკავშირეებსა და მეზობელ ქვეყნებში.
„კიშინიოვში მდივანი ბლინკენი შეხვდება მოლდოვის პრეზიდენტ მაია სანდუს და სხვა ოფიციალურ პირებს, რათა დაადასტუროს აშშ-ის მხარდაჭერა მოლდოვის ევროკავშირში გაწევრიანებისა და ენერგეტიკული უსაფრთხოების მიმართ“, – აღნიშნულია სახელმწიფო დეპარტამენტის მიერ გავრცელებულ ინფორმაციაში.
მოლდოვაში ვიზიტის დასრულების შემდეგ ენტონი ბლინკენი ჩეხეთის დედაქალაქ პრაღაში გაემგზავრება, სადაც საგარეო საქმეთა მინისტრ იან ლიპავსკისთან და სხვა ოფიციალურ პირებთან გამართავს შეხვედრას, რათა განიხილონ უკრაინის მხარდაჭერა, ერთობლივი თავდაცვის მოდერნიზაცია და ენერგეტიკული კავშირების გაღრმავება.
როგორც სახელმწიფო დეპარტამენტის მიერ გავრცელებულ ინფორმაციაშია აღნიშნული, პრაღაში ყოფნისას ენტონი ბლინკენი ნატო-ს საგარეო საქმეთა მინისტრების არაფორმალურ შეხვედრაში მიიღებს მონაწილეობას. სახელმწიფო დეპარტამენტის ცნობით, შეხვედრის მიზანია, ლიდერებმა განიხილონ ნატო-ს მომავალი სამიტის პრიორიტეტები.