კეთილი ინებონ, გამოვიდნენ და თქვან, კონკრეტულად რომელი მუხლია მათთვის მიუღებელი და რატომ, – განაცხადა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა ოპოზიციის მისამართით „ოჯახური ღირებულებებისა და არასრულწლოვანთა დაცვის შესახებ“ კანონპროექტზე საუბრისას.
„როდესაც ოპოზიცია ამბობს, რომ არ უჭერს მხარს ოჯახური სიწმინდის და არასრულწლოვანთა დაცვის ინიციატივას, ეს ნიშნავს, რომ ის მხარს უჭერს როგორც ერთსქესიანთა ქორწინებას, ასევე მხარს უჭერს საბავშვო ბაღებში და სკოლებში ლგბტ პროპაგანდას და შესაბამისი ლიტერატურის, თუ სახელმძღვანელოების დანერგვას. კეთილი ინებონ, გამოვიდნენ და თქვან, კონკრეტულად რომელი მუხლია მათთვის მიუღებელი და რატომ“, – აღნიშნა იონათამიშვილმა.
„ოჯახური ღირებულებებისა და არასრულწლოვანთა დაცვის შესახებ“ კანონპროექტი მომდევნო კვირაში პარლამენტში ბიუროზე გავა, რის შემდეგაც საკითხზე კომიტეტებში იმსჯელებენ. ოპოზიცია კანონპროექტებს მხარს არ უჭერს მიუხედავად იმისა, რომ მათი ნაწილი მიიჩნევს, რომ ლგბტ პროპაგანდა დღეს გამოწვევაა.