უკრაინის შეიარაღებული ძალების მთავარსარდალმა ოლექსანდრ სირსკიმ ბრიტანულ გაზეთ The Guardian-თან ინტერვიუში განაცხადა, რომ ფრონტის ხაზის მრავალ მიმართულებაზე რთული ვითარებაა.
მისი თქმით, სიტუაცია „ძალიან მძიმეა“. როგორც სირსკიმ განაცხადა, რუსული მხარე უკრაინულ პოზიციებს „ყველა მიმართულებით უტევს“. სირსკი თვლის, რომ ამ მდგომარეობიდან გამოსავალი პირველ რიგში უკრაინელ ჯარისკაცებზეა დამოკიდებული.
უკრაინის შეიარაღებული ძალების მთავარსარდალი ასევე აღნიშნავს, რომ რუსეთს უპირატესობა აქვს სამხედრო ტექნიკასა და რესურსებში. „მოწინააღმდეგს საკმაოდ დიდი უპირატესობა აქვს ძალებსა და რესურსებში. როდესაც საქმე ეხება ტექნიკას, ძალთა თანაფარდობა 1:2 ან 1:3 მათ სასარგებლოდაა“, – დასძინა სირსკიმ.
მისი თქმით, რუსეთის ფედერაციამ 2022 წლის შემდეგ ორჯერ გაზარდა ტანკების რაოდენობა, ხოლო საარტილერიო სისტემები – სამჯერ. რუსეთს აქვს უპირატესობა ავიაციაში, მას აგრეთვე ძლიერი ჰაერსაწინააღმდეგო სისტემა აქვს, რის გამოც უკირაინული ჯარი იძულებულია უპილოტო საფრენი აპარატაბი გამოიყენოს.