გამოძიების ფედერალური ბიუროს დირექტორი აცხადებს, რომ დონალდ ტრამპზე თავდასხმამდე, მეთიუ კრუკსი ინტერნეტში ჯონ კენედის მკვლელობის შესახებ ინფორმაციას ეძებდა. გამოძიების მიერ მოპოვებული ახალი ინფორმაცია ბიუროს დირექტორმა, კრისტოფერ რეიმ შეერთებული შტატების წარმომადგენელთა პალატის იურიდიულ საკითხთა კომიტეტს საგანგებო მოსმენაზე გააცნო. რეიმ აღნიშნა, რომ თავდამსხმელის მოტივი ამ დრომდე უცნობია, თუმცა პირობა დადო, რომ მკვლელობის მცდელობას სრულად გამოიძიებენ.
„ამ ეტაპზე გამოძიების მიერ აღმოჩენილი ერთ ერთი დეტალი შემიძლია გაგიზიაროთ, რომელიც ჯერ არ გამოქვეყნებულა. ორი დღის წინ დაკავებულის ნოუთბუქის ანალიზისას გაირკვა, რომ 6 ივლისიდან მოყოლებული, კრუკსი „გუგლის“ საძიებო სისტემაში სისტემატურად ეცნობოდა ინფორმაციას, თუ რამდენად შორს იყო ოსვალდი კენედისგან? ეს სავარაუდოდ იგივე დღეა, როცა ის შეკრებაზე დასასწრებად დარეგისტრირდა. უკვე ვიცით, რომ მან ტრამპს 8 ჯერ ესროლა, ამდენი მასრაა აღმოჩენილი სახურავზეც, მსროლელის ტელეფონში ვიპოვეთ პრეზიდენტ ბაიდენის და სხვა მაღალჩინოსნების ფოტოები, თუმცა მკვლელობის მცდელობამდე რამდენიმე დღით ადრე, კრუკსი აქტიურად ეძებდა ინფორმაციას კონკრეტულად ტრამპის შესახებ. თავდასხმის მოტივი ამ დრომდე უცნობი რჩება, გარწმუნებთ, მკვლელობის მცდელობა სრულად იქნება გამოძიებული“, – აღნიშნა აშშ-ის გამოძიების ფედერალური ბიუროს დირექტორმა კრისტოფერ რეიმ.