ისრაელის არმიამ ღაზის სექტორში მიმდინარე საომარი მოქმედებების დროს ისლამური ჯიჰადის დაზვერვის დანაყოფის მეთაური უსამა ჯადალა მოკლა. ინფორმაცია ისრაელის თავდაცვის არმიის („ცაჰალის“) ტელეგრამ არხზეა გამოქვეყნებული.
„გასული დღე-ღამის განმავლობაში ჯარმა ახლო შეტაკებებსა და ავიაიერიშების დროს ათობით ტერორისტი გაანადგურა. ხან იუნისის რაიონში ერთ-ერთი ლიკვიდირებული ტერორისტი უსამა ჯადალა იყო, რომელიც ისლამური ჯიჰადის დაზვერვის დანაყოფის მეთაური იყო“, – ნათქვამია ინფორმაციაში.
ისრაელის არმიის მტკიცებით, ჯადალა 2023 წლის 7 ოქტომბერს „ჰამასის“ მიერ ისრაელის ტერიტორიაზე შეჭრასა და ებრაელების დახოცვაში მონაწილეობდა.
გარდა ამისა, გასული დღე-ღამის განმავლობაში ისრაელის სამხედრო-საჰაერო ძალებმა ღაზის სექტორში მდებარე დაახლოებით 40 ტერორისტულ ობიექტზე მიიტანეს იერიში. განადგურებულია ტერორისტების გამშვები დანადგარები, სამხედრო ნაგებობები, ინფრასტრუქტურა.