ქუჩაში თამბაქოს მოწევა არ იკრძალება

ქუჩაში თამბაქოს მოწევასთან დაკავშირებულ რეგულაციებს ”თამბაქოს კონტროლის შესახებ“ კანონპროექტი არ ითვალისწინებს, – ამის შესახებ ”თამბაქოს კონტროლის ალიანსის” ხელმძღვანელმა გიორგი ბახტურიძემ დღეს გამართულ პრესკონფერენციაზე განაცხადა, რითაც გამოეხმაურა ამ მიმართულებით არსებულ ინტერესს და უპასუხა კითხვას – ახალი კანონპროექტის თანახმად, შეიძლება თუ არა ქუჩაში მოწევა?
”მე არ ვიცი ვინ გაავრცელა ეს ინფორმაცია, ეს კანონი ამ რეგულაციას არ ითვალისწინებს”, – აღნიშნა გიორგი ბახტურიძემ.
რაც შეეხება კომპანიების ეზოებში მოწყობილ სივრცეს, სადაც თანამშრომლები თამბაქოს ეწევიან. ბახტურიძის განმარტებით, მოქალაქეებს ასეთი სივრცეებით სარგებლობის შესაძლებლობა ექნებათ.
”ეზოებში რა პრობლემა არის? შენობებს ვეხებით. დახურულ სივრცეში მოწევა აკძალული იქნება. თუკი რესტორანს გარე ტერასა აქვს, ან სამუშაო ადგილს ბაღი აქვს, პრობლემა არ არის, შეუძლია ამით ისარგებლონ”, – განაცხადა გიორგი ბახტურიძემ.
კიდევ ერთი საკითხი ტაქსებში მოწევას უკავშირდება. ტაქსების შემთხვევაში გარდამავალი დებულება არსებობს.
”ამ ეტაპზე აკრძალვა არ ვრცელდება, მაგრამ როგორც კი ტაქსების რეგულაცია შემოვა, მაშინვე ამოქმედდება სრული აკრძალვა ტაქსებში. დღეს ტაქსების არანაირი სტანდარტი და ლიცენზირების ფორმები არ არსებობს. როგორც კი ეს ფორმები შემოვა, იქვე იქნება მოწევის აკრძალვასთან დაკავშირებით პირობა ჩადებული”, – განმარტა გიორგი ბახტურიძემ.