“საქართველოს ისტორიაში ყველაზე დიდი და მნიშვნელოვანი ჰესის – “დარიალი ჰესის” მშენებლობა დასრულდა”

“დღეს საქართველოს ენერგეტიკისთვის და ქვეყნისთვის ღირსშესანიშნავი, შეიძლება ითქვას, რომ ისტორიული დღეა”, – აღნიშნული განცხადება საქართველოს ვიცე-პრემიერმა, ენერგეტიკის მინისტრმა, კახა კალაძემ “დარიალი ჰესის” გახსნის ღონისძიებაზე გააკეთა.
“დასრულდა დამოუკიდებელი საქართველოს ისტორიაში ყველაზე დიდი და მნიშვნელოვანი ჰესის – “დარიალი ჰესის” მშენებლობა. ეს ჰესი არა მარტო მნიშვნელოვანია ქვეყნის ეკონომიკური განვითარებისთვის, ენერგეტიკისთვის, არამედ ეს არის საძირკველი, ათვლის წერტილი კონკრეტულად ამ რეგიონის უსწრაფესად განვითარებისა და გამდიდრებისთვის”, – განაცხადა კალაძემ.
ვიცე-პრემიერმა პრემიერ-მინისტრსა და მთავრობის წევრებს  პროექტის განხორციელების ხელშეწყობისთვის მადლობა გადაუხადა.
“წარმოუდგენელია ჩვენი ქვეყანა ეკონომიკურად განვითარდეს, თუ ჩვენ არ ვიქნებით ენერგეტიკულად ძლიერი. ასეთი მნიშვნელოვანი პროექტის განხორციელება გვაძლევს შესაძლებლობას, ერთი მხრივ, ენერგოდამოუკიდებლობის და მეორე მხრივ, სამუშაო ადგილების შექმნის კუთხით”, – განაცხადა კახა კალაძემ.