უკრაინის სამხედრო ხელმძღვანელობა ფრონტის ხაზზე რუსეთის მასშტაბური შეტევის მოლოდინში მედპერსონალს აგზავნის. სტატიას ამ შინაარსით The Financial Times-ი ავრცელებს.
გამოცემის მტკიცებით, როგორც უკრაინა, ისე რუსეთი ბრძოლის ველზე უპირატესობის მოპოვებას ცდილობენ მანამ, სანამ დონალდ ტრამპი ოფიციალურად შეუდგება აშშ-ის პრეზიდენტის მოვალეობის შესრულებას.
სამხედროები და ანალიტიკოსები ვარაუდობენ, რომ შემდეგ რამდენიმე თვეში ომი უკრაინაში კრიტიკულ ფაზაში შევა. ორივე მხარეს მოლაპარაკების დაწყებამდე საკუთარი პოზიციების გაძლიერება სურს.
გასულ თვეებში მოსკოვმა შეტევა გააძლიერა, რის გამოც უკრაინის შეიარაღებულ ძალებს ქვეყნის აღმოსავლეთში პოზიციების შენარჩუნება უჭირს. რუსები სულ უფრო სწრაფად მიიწევენ წინ.
უკრაინის ხელმძღვანელობა აღიარებს, რომ მათი თავდაცვა იშლება, რადგან პირადი შემადგენლობის ნაკლებობას განიცდის. კიევი ელოდება, რომ შეტევა სულ უფრო მოიკრებს ძალებს, ხოლო უკრაინის არმიის წარმომადგენელმა The Financial Times-ს განუცხადა, რომ აღმოსავლეთ ფრონტზე სულ უფრო მეტ სამედიცინო პერსონალს აგზავნიან, რადგან ელიან, რომ მომავალ კვირებსა და თვეებში მძიმე ბრძოლები გაიმართება.
როგორც The Financial Times-ი იუწყება, მთავარი ბრძოლა მოსალოდნელია, რომ რუსეთის კურსკის ოლქში გაიმართოს, სადაც აგვისტოში ყველასთვის მოულოდნელად უკრაინული ჯარი შეიჭრა. რუსეთმა იმ მიმართულებაზე 50 ათას ჯარისკაცს, მათ შორის ჩრდილოეთ კორეიდან მოუყარა თავი. მათ მიზანს უკრაინული ჯარის უკუგდება წარმოადგენს.
1000 კილომეტრზე გადაჭიმული ფრონტის რამდენიმე ცხელ წერტილში უკრაინული ჯარი უმოწყალო რუსულ იერიშებს ჰაერიდან და ხმელეთიდან იგერიებს. ქალაქ კურახოვოსთან განლაგებული საარტილერიო ქვედანაყოფის მეთაურის განცხადებით, რუსული ჯარი მათ სამი მხრიდან უტევს. მისი თქმით, ის და მისი ჯარი უკან დახევისთვის მზად არის, თუმცა „შესაბამისი ბრძანება ზემოდან ჯერ არ მოსულა“.