საპარლამენტო უმრავლესობის წევრი თენგიზ შარმანაშვილი მიიჩნევს, რომ ეუთო-ს საპარლამენტო ასამბლეა თავისი განცხადებით, ფაქტოვრივად, ამბობს, რომ საქართველოს პარლამენტი შედგა.
შარმანაშვილი საქართველოს საპარლამენტო არჩევნებთან დაკავშირებით ეუთო-ს საპარლამენტო ასამბლეის წარმომადგენლის განცხადებას გამოეხმაურა.
„ისინი, ფაქტობრივად, ამბობენ, რომ საქართველოს პარლამენტი შედგა და ის რეკომენდაციები, რასაც გეუბნებით, ამ პარლამენტის შესასრულებელიაო. აქ პარლამენტის ლეგიტიმურობაზე კი არ არის საუბარი, არამედ ლაპარაკია იმაზე, რომ ეს პარლამენტი შედგა და ჩვენი რეკომენდაციები კანონმდებლობაში უნდა ასახო. ჩვენ ამისთვის მზად ვართ, და ყველას მოუწოდებენ, ლეგიტიმურად მოხდეს ჩვენს კანონმდებლობაში ყველაფრის ასახვა, რა შენიშვნებიც მათ აქვთ. ჩვენ მზად ვართ, ამაში დაგეხმაროთ, ერთმანეთთან დასხდეთ და ეს განახორციელოთ. ეს ყველაფერი უნდა მოხდეს პარლამენტის წიაღში. საქართველოს მოსახლეობამ მანდატი მოგცა იმ მასშტაბით, რა მასშტაბითაც მოგცა. სად გაგონილა იმის გაპროტესტება, რომ ვინაიდან მმართველი პარტიის რაოდენობის მანდატები არ მომეცი, ამიტომ ყველაფერი არალეგიტიმურია? ეუთო-ს საპარლამენტო ასამბლეა ასე არ უყურებს. ის ამბობს, შებრძანდით პარლამენტში, ჩვენს რეკომენდაციებზე იმუშავეთ და ერთად ყოფნაში ხელს შეგიწყობთ, საპარლამენტო დიალოგის დროს შენიშვნების გამოსწორებაშიც დაგეხმარებითო. წერია, რომ ეს სამუშაო პარლამენტს აქვს ჩასატარებელი. ე.ი. გასაგებია, მთელი ეს პროცესი, დიალოგი სად უნდა გაიმართოს. სხვა ადგილს არ ამბობს. არ ამბობს, ქუჩაში მოილაპარაკეთ ან სხვა ადგილზე შეიკრიბეთ და იქ მოილაპარაკეთო. ეს საქმე პარლამენტის გასაკეთებელიაო და ახლად არჩეულ პარლამენტზე საუბრობს“, – განაცხადა თენგიზ შარმანაშვილმა.
შარმანაშვილმა ასევე შეაფასა უთო-ს საპარლამენტო ასამბლეის განცხადების ის ნაწილი, სადაც ეუთო-ს საპარლამენტო ასამბლეის წარმომადგენელი საპროტესტო აქციის მონაწილეებს – ძალადობისგან თავის შეკავებისკენ, ხოლო ხელისუფლებას შეკრებისა და გამოხატვის უფლებების დაცვისკენ მოუწოდებს.
„ეს გზავნილი ნიშნავს, რომ, იმ ძალებისგან განსხვავებით, რომლებიც საქართველოში ქაოსს აფინანსებენ, ევროპაში უკვე გამოჩნდა ძალები, რომლებიც ყურადღებას აქცევენ, რომ პროტესტს არანაირი მშვიდობიანი ელფერი აღარ აქვს. ოპონენტების მხრიდან ძნელი დასადასტურებელია, რომ ლეგიტიმურია პარლამენტში ცეცხლის გაჩენა, პოლიციისთვის „მოლოტოვის კოქტეილის“ სროლა ან პიროტექნიკით პოლიციელების დაშავება. ამას მოთხოვნების ვერანაირი ლეგიტიმაციით ვერ ახსნი. მოხარული ვარ, რომ ევროპა ამ აქციების ძალადობრივ ხასიათს უკვე ყურადღებას აქცევს“, – განაცხადა თენგიზ შარმანაშვილმა.