ზეწოლა რომელიც საქართველოზე ხორციელდება სხვადასხვა მიმართულებით, ხორციელდება ქვეყნის პარტნიორებზეც, – განაცხადა „დღის ქრონიკაში“ საგარეო საქმეთა მინისტრმა, მაკა ბოჭორიშვილმა კითხვაზე რა საფუძველი აქვს საქართველოს ჰქონდეს მოლოდინი იმის, რომ ევროკავშირთან უვიზო მიმოსვლა არ შეჩერდება.
„მე არ დავასახელებ ქვეყანას, მაგრამ არაფორმალური შეხვედრების დროს ისიც კი გააჟღერა ერთ-ერთმა მინისტრმა, რომ მას აკრძალული აქვს საქართველოს ხელისუფლებასთან კომუნიკაცია და ეს ღიმილის მომგვრელია ერთის მხრივ, მაგრამ მეორეს მხრივ, ასახავს თუ რამდენად არიან ჩვენი წამყვანი პარტნიორი ქვეყნები, ასე ვთქვათ, პოლიტიკური სპექტრი რაღაც მითითებების ქვეშ და ძალიან სამწუხაროა ეს, თუმცა მე იმედი მაქვს, რომ ძალიან მალე ეს სიტუაცია შეიცვლება“, – განაცხადა ბოჭორიშვილმა.
მისი თქმით, საქართველოს ძალიან მალე ექნება სულ სხვა ვითარება მაშინ, როდესაც ქვეყანა გადავა პარტნიორებთან რეალური საქმის კეთებაზე.
„რაც შეეხება საგარეო კურსს. საქართველოს საგარეო კურსი ვერ იქნება იმაზე მკაფიო ვიდრე არის, ჩვენი საგარეო კურსი ძალიან დიდი ხანია განსაზღვრულია და ძალიან დიდი ხანია საქართველო იბრძვის იმისთვის, რომ ადგილი დაიმკვიდროს სწორედ ევროატლანტიკური ინტეგრაციის გზაზე და ახლა ნამდვილად არ გვესწავლება არავისგან, როგორ უნდა ვიაროთ ამ გზაზე, რამდენად მყარად ვიდგეთ და არავის არ აქვს უფლება კითხვის ნიშნები დასვას ამ სიმყარესთან დაკავშირებით“, – აღნიშნა ბოჭორიშვილმა.
საგარეო საქმეთა მინისტრმა ასევე აღნიშნა, რომ ძალიან მნიშვნელოვანია რომ ეს პროცესი არ გახდეს პოლიტიკური მანიპულაციების მსხვერპლი. ამის თვალსაჩინო მაგალითები არსებობდა კანდიდატის სტატუსის მონიჭების პროცესში.
„ახლაც ვხედავთ, როგორ ხდება ევროინტეგრაციასთან დაკავშირებული საკითხების ცუდად გამოყენება და ეს აზიანებს იმ პროცესს, რაც ჩვენი ქვეყნისთვის არის ძალიან მნიშვნელოვანი. რა თქმა უნდა, ჩვენ მაქსიმალურად უნდა ვეცადოთ, რომ ეს ყველაფერი თავიდან იყოს აცილებული, მაქსიმალურად უნდა ვეცადოთ, რომ ჩვენს პარტნიორებთან გვქონდეს ბევრად უფრო გულწრფელი საუბარი, წუხილები გვესმის, ჩვენც ჩვენი წუხილები გვაქვს, მათ მათი წუხილები აქვთ, მაგრამ მთავარია შევთანხმდეთ მიზანზე“, – განაცხადა ბოჭორიშვილმა.
მან ასევე ისაუბრა ავსტრიის საგარეო საქმეთა მინისტრთან შეხვედრაზე და აღნიშნა, რომ იყო განხილული ბევრი საკითხი. კოლეგებს შორის ღია საუბარი შედგა საქართველოში მიმდინარე მოვლენებზე, ქვეყნის ევროინტეგრაციასთან დაკავშირებულ საკითხებზე.
„შეხვედრაზე ცალსახად ითქვა, რომ არც ჩვენ და არც მათ არ სურთ, რომ საქართველო არ წავიდეს წინ ევროკავშირში გაწევრიანების გზაზე. თუკი ჩვენ ორივე მხარეს გვამოძრავებს ეს სურვილი, რა თქმა უნდა, ქმედებებიც უნდა იყოს გარკვეულწილად სხვაგვარი და მაშინ, როდესაც გვესმის, რომ დიალოგი არ უნდათ, რომ ჰქონდეს ვიღაცას საქართველოს ხელისუფლებასთან, წარმოუდგენელია მაშინ ეს სურვილი, როგორ უნდა განხორციელდეს. ევროკავშირში ინტეგრაცია არის ორმხრივი პროცესი“, – აღნიშნა ბოჭორიშვილმა.