ყველა მათგანს დეტალურად შევისწავლით და სადაც ამის რესურსი იქნება, ევროკავშირთან კოორდინაციით დავგეგმავთ შესაბამის ნაბიჯებს, – განაცხადა ევროპასთან ინტეგრაციის კომიტეტის თავმჯდომარემ ლევან მახაშვილმა ევროკომისიის ანგარიშთან დაკავშირებით.
„საქართველოსთან დაკავშირებით ეს ანგარიში არის პოზიტიური აბსოლუტურად ყველა მიმართულებით, რომელიც არის საკვანძო და ძირითადი კომპონენტი უვიზო რეჟიმის გამართულად ფუნქციონირებისთვის. ბოლო ერთი წლის მანძილზე საქართველომ არა უბრალოდ გააძლიერა და კიდევ უფრო მჭიდრო გახადა ევროკავშირის შესაბამის სააგენტოებთან თანამშრომლობა, იქნებოდა ეს საპოლიციო თანამშრომლობა, სასამართლო თანამშრომლობა, საზღვრის დაცვის მიმართულებით თანამშრომლობა. ამას გარდა, რა თქმა უნდა ჩვენ პირნათლად შევასრულეთ წინა ანგარიშით გათვალისწინებული რეკომენდაციების დიდი ნაწილი.
ისევე როგორც წინა ანგარიშები, ამ ანგარიშშიც ევროკომისიას აქვს ცალკეული რეკომენდაციები იმისათვის, რომ ამ [უვიზო რეჟიმის] სისტემამ კიდევ უფრო გამართულად და ნაკლის გარეშე იფუნქციონიროს. ზოგადად არის დაახლოებით ოთხი ძირითადი რეკომენდაცია. პირველი ეს არის სავიზო პოლიტიკის დაახლოება, რაც ნიშნავს იმას, რომ არის ცალკეული სახელმწიფოები, რომელთანაც საქართველოს აქვს უვიზო რეჟიმი მაშინ, როდესაც ევროკავშირს არ აქვს მთლიანად აღებული. დანარჩენი სამი თემა ეხება გამჭვირვალობის კანონს, ოჯახური ღირებულებების დაცვის კანონს და მესამე საკითხი რაც ასევე იყო, ეს არის ადამიანის უფლებების სტრატეგიაში, რომელიც საქართველომ მიიღო, სექსუალური უმცირესობის საკითხების სათანადოდ არ ასახვა. ყველა მათგანს დეტალურად შევისწავლით და სადაც ამის რესურსი იქნება, ევროკავშირთან კოორდინაციით დავგეგმავთ შესაბამის ნაბიჯებს“, – აღნიშნა მახაშვილმა.
საქართველოში ევროკავშირის წარმომადგენლობა ევროკომისიის ანგარიშს აქვეყნებს.