კონკრეტული ძალები ქვეყნის შიგნით და ქვეყნის გარეთ ცდილობენ შეასრულონ სწორედ ის სცენარი, რასაც ხელისუფლების ძალადობრივად შეცვლა ჰქვია, – განაცხადა საპარლამენტო უმრავლესობის წევრმა ირაკლი ქადაგიშვილმა გადაცემაში „დღის ქრონიკა“.
მან ასევე აღნიშნა, რომ ის სიძულვილის და დაპირისპირების ხარისხი, რომელიც დღეს საზოგადოებაში იგრძნობა, ასე მყისიერად და მარტივად ვერ შეიცვლება, რადგან ეს პროცესი არის მართვადი.
„აქ არ არის იმაზე საუბარი, რომ ვიღაცას რაღაც არგუმენტების მოსმენა უნდა ან ინფორმაცია აკლია. აქ არის კონკრეტული ძალები ქვეყნის შიგნით და ძალიან კონკრეტული ძალები ქვეყნის გარეთ, რაც მთავარია ვინც კონკრეტულად ცდილობს, რომ სწორედ ის სცენარი შეასრულოს, რასაც ხელისუფლების ძალადობრივად შეცვლა ჰქვია, ამიტომ ისინი ცდილობენ, რომ ამ სცენარის ყველა პუნქტი ბოლომდე გაიარონ“, – განაცხადა ქადაგიშვილმა.
მან აღნიშნა, რომ ამ შემთხვევაში ყველაზე მნიშვნელოვანია, რომ საზოგადოებამ და სახელმწიფომ დიდი ძალისხმევა და მოთმინება გამოიჩინონ.
„ეს სცენარი ვერ განხორციელდება. გასაგებია, რომ სცენარის განუხორციელება გამოიწვევს ფრუსტრაციას და ამით ნელ-ნელა მოხდება საზოგადოების და პროცესის ასე ვთქვათ ნორმალური კალაპოტისკენ წაყვანა. ამავდროულად, ძალიან დიდი მნიშვნელობა აქვს იმას, რომ თვითონ მსოფლიოში უნდა შეიცვალოს დამოკიდებულებები. ჩვენ ვხედავთ მაგალითად, რომ იგივე ევროკავშირის ელჩი არა მარტო ქვეყნის შიგნით დააბულინგეს და დააბულინგეს რატომ? იმიტომ, რომ უყურებდნენ არჩევნებამდე ეს ადამიანი და კიდევ ბევრი სხვა უცხოელი აქტორი, დიპლომატი, თუ პოლიტიკოსი წინასაარჩევნო კამპანიაში იყვნენ ჩართულები. წააგეს და ახლა წაგებული მხარე მის შეხვედრას არსებულ ხელისუფლებასთან განიხილავს, როგორც ღალატს და აბულინგებენ არა მარტო აქ, უცხოელებიც, უცხო ქვეყნის პოლიტიკოსებიც აბულინგებენ ახლა და არ უწონებენ ამ საქციელს ქვეყანაში აკრედიტებულ ელჩს, არ უწონებენ ქვეყნის საგარეო საქმეთა მინისტრთან შეხვედრას. გვესმის ხომ ჩვენ რა დონის კოორდინირებულ შეტევასთან გვაქვს საქმე საქართველოსა და საქართველოს სახელმწიფოს წინააღმდეგ“, – აღნიშნა ქადაგიშვილმა.
მისი თქმით, აქ არიან პოლიტიკოსები, რომლებიც ძალაუფლების ხელში ჩაგდების მიზნით და უცხოური დაკვეთის შესრულების მიზნით ამ ყველაფერს ძალიან მშვიდად და კარგად უყურებენ. რაც შეეხება სალომე ზურაბიშვილს, ის თავის დარჩენილ საპრეზიდენტო დღეებს ახმარს იმას, რომ ქვეყანაში ეს დაპირისპირება უკიდურესად გამწვავდეს, აღნიშნა ქადაგიშვილმა.
„მაგრამ მე ვხედავ იმასაც, რომ მიუხედავად იმისა, რომ საზოგადოება, ბუნებრივია, შეწუხებულია ამ ამბით, შეწუხებულია მათ შორის ძალადობით, არ აქვს მნიშვნელობა რომელი მხრიდან, მაგრამ საზოგადოების აბსოლუტური უმრავლესობა ხედავს, რომ ამ ასე ვთქვათ შემოტევას უნდა გაუძლოს საზოგადოებამ, გაუძლებს სახელმწიფო და, რა თქმა უნდა, საბოლოო ჯამში, ეს ყველაფერი დასრულდება. თქვენ მოგეხსენებათ, რატომ იყო იგივე გახარიას მხრიდან წამოცდენა, რომ ჩვენ ეს ყველაფერი უნდა მოვასწროთ 20 იანვრამდეო იმიტომ, რომ 20 იანვრის შემდეგ იცვლება პოლიტიკური გეზი აშშ-ს პოლიტიკისა და ის დამოკიდებულება, რაც იყო „ფერადი რევოლუციების“ მსოფლიოში გავრცელებასთან დაკავშირებით, უკვე რომ იტყვიან თავის პოლიტიკურ დაკვეთას კარგავს. ამიტომ სანამ დრო არის უნდა მოასწრონ“, – განაცხადა ქადაგიშვილმა.