უკრაინის პრეზიდენტის ვოლოდიმირ ზელენსკის უარი ამერიკის მოწოდებაზე, რომ ომში 18 წლის ახალგაზრდებიც გაეწვია, მისი მხრიდან აშშ-ის პრეზიდენტ ჯო ბაიდენზე ერთ-ერთი ყველაზე ღია თავდასხმა იყო. ინფორმაციას The Telegraph-ი ავრცელებს.
The Telegraph-ის ცნობით, ზელენსკისა და ბაიდენს შორის ბოლო სამ წელიწადში არაერთი კონფლიქტური სიტუაცია ყოფილა, თუმცა ამ დაპირისპირებით, სავარაუდოდ, ყველა კონფლიქტი გადაიფარა.
ბოლო დროს ამერიკელი ჩინოვნიკები უკრაინელ კოლეგებს ომში გასაწვევი მამაკაცების ასაკის 25-დან 18 წლამდე დაწევას სთხოვდნენ, რათა ისინი ფრონტის ხაზზე რუსეთთან საომრად გაეგზავნათ.
ოფიციალური ვაშინგტონი საკუთარ პოზიციას იმით ხსნის, რომ ჯარისკაცების დეფიციტი უკრაინაში კრიტიკულ ზღვარს აღწევს, რადგან რუსეთი უკრაინის აღმოსავლეთით სტაბილურ პროგრესს აღწევს, და არსებობს იმის საფრთხე, რომ აშშ-ის არჩეული პრეზიდენტი დონალდ ტრამპი უფლებამოსილების განხორციელების დაწყებისთანავე კიევს სამხედრო დახმარებას შეუწყვეტს.