უკრაინის პრეზიდენტის, ვოლოდიმირ ზელენსკის თქმით, დონალდ ტრამპის დაპირება, რომ უკრაინაში ომს „24 საათში დაასრულებს“, პირდაპირი მნიშვნელობით არ ესმის. ამის შესახებ უკრაინის პრეზიდენტმა ამერიკულ ტელეარხ „სიბიენთან“ ინტერვიუში ისაუბრა.
ზელენსკის თქმით, უკრაინელებს ახლა ტრამპის იმედი აქვთ, რადგან „მას აქვს ძლიერი პრეზიდენტის პოზიცია“.
„ამ ძალის მეშვეობით, რადგან პუტინს ესმის მხოლოდ ძალის, ჩვენ გვერდით, ჩემ გვერდით იქნება ძლიერი ქვეყნის ძლიერი პრეზიდენტი და ჩვენ ამ სიძლიერით მივაღწევთ მშვიდობას“, – აღნიშნა ზელენსკიმ.
ჟურნალისტის კითხვაზე ტრამპის განცხადების შესახებ, სადაც აშშ-ის არჩეული პრეზიდენტი ამბობს, რომ უკრაინაში ომს 24 საათში დაასრულებს, ზელენსკიმ განაცხადა, რომ „რა თქმა უნდა, ეს კითხვა არ მდგომარეობს იმაში, რომ მან ასეთი საკითხი 24 საათში უნდა გადაწყვიტოს“.
„მე მესმის მისი სიტყვები, რომ სურს ამის გაკეთება სწრაფად და ვფიქრობ, რომ მნიშვნელოვანია ეს მოხდეს უფრო სწრაფად, რადგან ჩვენ ყოველდღიურად ვკარგავთ ხალხს“, – აღნიშნა ზელენსკიმ.
ამასთან, უკრაინის პრეზიდენტის თქმით, უკრაინაში ომი უნდა დასრულდეს ისე, რომ ხელახლა დაწყების შესაძლებლობა არ არსებობდეს.