„რამშტაინის“ ავიაბაზასთან უცნობი დრონები შენიშნეს. ამის შესახებ ინფორმაციას გერმანული გამოცემა „შპიგელი“ ავრცელებს.
სტატიაში აღნიშნულია, რომ ბოლო რამდენიმე კვირის განმავლობაში უპილოტო საფრენი აპარატები არაერთი მნიშვნელოვანი სამრეწველო ობიექტის თავზე შენიშნეს, მათ შორის, ავიაბაზა „რამშტაინთან“, რომელსაც ამერიკის შეერთებული შტატები იყენებს.
გერმანიის უსაფრთხოების სამსახურების კონფიდენციალური ანგარიშის მიხედვით, 3 და 4 დეკემბერს ავიაბაზის საჰაერო სივრცეში მრავალრიცხოვანი უცნობი დრონი შენიშნეს.
გამოცემა წერს, რომ, ინტენსიური ღონისძიებების მიუხედავად, დრონის ოპერატორის პოვნა ვერ მოხერხდა. უპილოტო საფრენი აპარატები ასევე შენიშნეს სამხედრო კომპანია Rheinmetall-ისა და ქიმიური გიგანტის BASF-ის ქარხნების სიახლოვესაც.
„შპიგელის“ ცნობით, აშშ-ის არმიამ დაადასტურა ავიაბაზა „რამშტაინის“ სიახლოვეს უცნობი უპილოტო საფრენი აპარატების გამოჩენა.
„ამ უპილოტო საფრენმა აპარატებმა არანაირი გავლენა არ მოახდინა ბაზის პერსონალზე, სამხედრო ტექნიკაზე ან ობიექტებზე, რომლებიც ბაზაზე მდებარეობს“, – აცხადებენ სამხედრო ბაზის წარმომადგენლები.
როგორც „შპიგელი“ წერს, ფლენსბურგის პროკურატურამ მომხდართან დაკავშირებით დივერსიული მიზნით ჯაშუშური საქმიანობის საქმეზე გამოძიება დაიწყო.