აშშ-ის არჩეული პრეზიდენტის დონალდ ტრამპის გარემოცვამ დანიის მთავრობას შეატყობინა, რომ ტრამპი სერიოზულად ეკიდება გრენლანდიის საკითხს. ინფორმაციას CNN-ი ავრცელებს.
ამერიკული ტელეარხის ცნობით, ახლა დანიის ხელისუფლება საგონებელშია ჩავარდნილი, თუ როგორ უპასუხოს ტრამპს ისე, რომ აშშ-თან ურთიერთობა სერიოზულად არ დაზარალდეს.
როგორც დანიის ოფიციალური პირები ამბობენ, ისინი ტრამპის გეგმებს არ ეთანხმებიან და ამ თემის გარშემო გულწრფელი საუბრის გამართვა, შესაძლოა, შექმნილი კრიზისის დაძლევის ერთადერთი საშუალება იყოს.
დანიის საგარეო საქმეთა მინისტრმა ლარს ლეკე რასმუსენმა, თავის მხრივ, განაცხადა, რომ მის ქვეყანას ტრამპის ადმინისტრაციასთან აღნიშნული საკითხის განხილვა სერიოზულად სურს. მისი თქმით, აშშ დიდი ხანია თანამშრომლობს დანიასთან არქტიკასა და გრენლანდიაში, სადაც ამერიკას სამხედრო ბაზა უკვე აქვს განლაგებული.
გრენლანდიის პრემიერ-მინისტრმა მუტე ეგედემ განაცხადა, რომ მას არ სურს მონაწილეობა მიიღოს აშშ-სა და დანიას შორის წარმოშობილ ბატალიებში. „გრენლანდია გრენლანდიელ ხალხს ეკუთვნის. ჩვენი მომავალი და თავისუფლებისთვის ბრძოლა – ჩვენი საქმეა“, – ციტირებს CNN-ი ეგედეს.