“ჩვენ ხომ ვიცით, ახლა ევროკავშირის გარკვეული ლიდერები ვინც არიან. ნაწილი ლობისტური კომპანიების მიერ დაქირავებული საგარეო საქმეთა მინისტრები არიან, რომლებსაც პირდაპირ დაკვეთა აქვთ, ჩვენი ქვეყნის წინააღმდეგ იმოქმედონ და მათგან რას უნდა ველოდოთ?”, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა.
მისი თქმით, ქართველი ერი, როგორც არასდროს, ერთიანია.
„წლებია, იმისთვის იბრძვიან, რომ ჩვენს სახელმწიფოს რაღაც დაუშავონ და დააშავონ. რეზოლუციას რეზოლუციაზე გვიწერდნენ ამათი ერთობლივი ძალისხმევით ევროპარლამენტარები, თურმე სააკაშვილი იყო პოლიტპატიმარი და კეზერაშვილი მედიამენეჯერი. ამ „სიმართლით“ რასაც მიიღებენ და რაც უკვე მიიღეს, ვხედავთ. მთავრობაში რომ ფსევდოლიბერალური გაერთიანებები იყო, ჩამოენგრათ და ჩამოეშალათ. ვხედავთ ევროპაში რაც მიმდინარეობს, გერმანიიდან დაწყებული. სად არის როთი? გიჟმანტასა? კუბილიუსა? ჩამოაშორეს, რადგან მართალი როცა არ ხარ, დაფინანსებული ხარ და საკუთარი ნებით არ ლაპარაკობ, შემდეგ გვერდზე გაგწევენ. ფოტიგა საერთოდ დაიკარგა. ასეთი ბედი ეწევათ დანარჩენებსაც, ახლა ვინც არიან. ეტყობა, ახალი დაფინანსება მიიღეს. ჩვენ, როგორც არასდროს, ქართველი ხალხი, ერი და ბერი ერთიანი ვართ და ევროინტეგრაციას ღირსებით გავივლით – არა ჩახდილები, არა ცალ ფეხზე, არამედ ღირსებით. ეს არის ჩვენი მოსახლეობის დაკვეთა“, – განაცხადა ზარქუამ.