მასთან ძირითადად საუბარი გვექნება თანამშრომლობის იმ საკითხებზე, რომლებიც შეეხება განათლებას, მეცნიერებას, კულტურას, – განუცხადა ჟურნალისტებს საქართველოს პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ უნგრეთის პრეზიდენტთან შეხვედრის შესახებ.
მისი თქმით, უნგრეთის პრეზიდენტს ზუსტად ისეთივე უფლებამოსილებები აქვს, როგორიც საქართველოს პრეზიდენტს.
„შესაბამისად, ეს არის სახელმწიფოს მეთაური, რომელსაც უფრო მეტად ცერემონიული უფლებები აქვს. მასთან ძირითადად საუბარი გვექნება თანამშრომლობის იმ საკითხებზე, რომლებიც შეეხება განათლებას, მეცნიერებას, კულტურას.
ეს იქნება უფრო მეტად ზოგადი ხასიათის შეხვედრა, სადაც ასევე აზრებს გავცლით ევროპაში მიმდინარე მოვლენებზე, ჩვენ რეგიონში მიმდინარე მოვლენებსა და ზოგადად, გლობალურ განვითარებაზე“, – აღნიშნა ნიკოლოზ სამხარაძემ.
უნგრეთში ქართული დელეგაციის ვიზიტი გრძელდება. დღეს დაგეგმილია უნგრეთის პრეზიდენტთან შეხვედრა. მანამდე კი შალვა პაპუაშვილი უნგრეთის პრემიერ-მინისტრსა და პარლამენტის თავმჯდომარეს შეხვდა. მხარეებს შორის უკვე დაიდო ჩარჩო-ხელშეკრულება, რომელიც ორი ქვეყნის პარლამენტებს შორის მუდმივ თანამშრომლობას გულისხმობს.