აშშ-ის ფედერალურმა მოსამართლემ ყოფილ ამერიკელ სენატორს, ბობ მენენდესს 11 წლით თავისუფლების აღკვეთა მიუსაჯა კორუფციის ბრალდებით. ინფორმაციას ამის შესახებ ამერიკული მედია ავრცელებს.
გასულ წელს, მენენდესი მასშტაბურ კორუფციულ სქემაში დამნაშავედ ცნეს. გამოძიების მიხედვით, სენატის საგარეო ურთიერთობათა კომიტეტის ყოფილი ხელმძღვანელი სხვა ქვეყნის ინტერესების გატარების სანაცვლოდ, დიდი ოდენობით ქრთამს იღებდა.
გამომძიებლებმა მის სახლში ოქროს ზოდებს, ასობით ათასი დოლარის ოდენობის ნაღდ ფულს და ძვირადღირებულ ნივთებს მიაგნეს.
2023 წლის 23 სექტემბერს, აშშ-ის იუსტიციის დეპარტამენტმა სენატორ ბობ მენენდესს ბრალი წაუყენა კორუფციასთან დაკავშირებულ საქმეზე.
ბობ მენენდესსა და მის მეუღლეს ბრალი ედებოდათ გავლენის სანაცვლოდ „ასობით ათასი დოლარის ქრთამის აღებაში“.
გამოძიების ფედერალურმა ბიურომ (FBI) „დემოკრატი“ სენატორის სახლის ჩხრეკისას 100 000 დოლარის ღირებულების ოქროს ზოდები და 480 000 დოლარი გადამალული ნაღდი ფული აღმოაჩინა.
საბრალდებო დასკვნის თანახმად, მენენდესი და მისი მეუღლე შეთანხმდნენ, მიეღოთ ასობით ათასი დოლარი ქრთამის სახით, რათა დაეცვათ სამი ბიზნესმენი ნიუ-ჯერსიდან – ვაელ „ვილ“ ჰანა, ხოსე ურიბე და ფრედ დაიბესი – და ასევე ეგვიპტეს სასარგებლოდ ემოქმედათ.
გარდა ამისა, მენენდესმა სენსიტიური ინფორმაცია მიაწოდა და „გადადგა სხვა ნაბიჯები, რომლითაც ფარულად დაეხმარა ეგვიპტის მთავრობას“.