აშშ-ის პრეზიდენტი დონალდ ტრამპი ვაშინგტონში მომხდარ ავიაკატასტროფას ეხმაურება და აცხადებს, მისი თავიდან აცილება უნდა მომხდარიყო.
„თვითმფრინავი აეროპორტთან მიახლოებისას იდეალურ და რეგულარულ ხაზზე იყო. ვერტმფრენი დიდი ხნის განმავლობაში პირდაპირ თვითმფრინავისკენ მიემართებოდა. ნათელი ღამეა, თვითმფრინავის განათება ჩართული იყო. რატომ არ აიფრინა ვერტმფრენმა მაღლა ან დაბლა, ან რატომ არ შეიცვალა მიმართულება? რატომ არ მისცა სადისპეტჩერო კოშკმა ვერტმფრენს კონკრეტული მითითება, კითხვის ნაცვლად, ხედავდნენ თუ არა თვითმფრინავს? ცუდი ვითარებაა, რომლის, როგორც ჩანს, თავიდან აცილება უნდა მომხდარიყო. კარგი არ არის“, – წერს ტრამპი.
ცნობისთვის, American Airlines-ის სამგზავრო თვითმფრინავი, რომელშიც 64 ადამიანი იმყოფებოდა, აშშ-ის არმიის Black Hawk-ის ტიპის ვერტმფრენს შეეჯახა. ჯერჯერობით უცნობია მსხვერპლის ზუსტი რაოდენობა. ავიაკატასტროფის ადგილას 19 ცხედარია ნაპოვნი. ამის შესახებ ინფორმაციას მედიას სამართალდამცავი უწყებები უდასტურებენ.