კანადის პრემიერ-მინისტრი, ჯასტინ ტრუდო გამოეხმაურა ტრამპის ადმინისტრაციის გეგმას, რომელიც კანადურ პროდუქტებზე მაღალი ტარიფების დაწესებას ითვალისწინებს. ინფორმაციას ამის შესახებ ტელეკომპანია CNN-ი ავრცელებს.
ტრუდომ ამერიკული მხარე გააფრთხილა, რომ კანადა ამ ნაბიჯს „მკაცრი და მყისიერი პასუხით“ უპასუხებს.
„არავის არ სურს ამერიკული ტარიფები კანადურ პროდუქტებზე“, – განაცხადა კანადის პრემიერ-მინისტრმა.
„დღეს კანადა-აშშ-ის საბჭოს წევრებს შევხვდი. აქტიურად ვმუშაობთ, რომ ეს ტარიფები თავიდან ავირიდოთ, მაგრამ თუ აშშ ამ ნაბიჯს გადადგამს, კანადა მზად არის მტკიცე და მყისიერი პასუხისთვის“, – აღნიშნა მან.
თეთრ სახლში პარასკევს განაცხადეს, რომ პრეზიდენტი დონალდ ტრამპი შაბათიდან კანადას, მექსიკასა და ჩინეთს ახალ ტარიფებს დაუწესებს.
თეთრი სახლის პრესმდივნის, კაროლინ ლევიტის თქმით, კანადასა და მექსიკას 25%-იანი საბაჟო გადასახადი დაეკისრებათ.