მიგრაციული პოლიტიკის გამკაცრების კანონპროექტს გერმანიის პარლამენტმა მხარი არ დაუჭირა. კანონპროექტი „ქრისტიან-დემოკრატიული კავშირის“ ლიდერმა, ფრიდრიხ მერცმა წარადგინა.
პირველმა წინადადებამ, რომელიც ულტრამემარჯვენე პარტია „ალტერნატივა გერმანიისთვის“ ხმების დახმარებით 29 იანვარს მიიღეს, მასობრივი პროტესტი გამოიწვია. პირველად მიღებული შუამდგომლობისგან განსხვავებით, კანონპროექტი ამჯერად იურიდიულად სავალდებულო იყო, რაც იმას ნიშნავს, რომ ის კანონი გახდებოდა, თუ მემარჯვენე ცენტრისტული „ქრისტიან-დემოკრატიული კავშირი“ (CDU), მერცის მეთაურობით, დააგროვებდა საკმარის ხმებს მის მხარდასაჭერად და ის თუ დამტკიცდებოდა პარლამენტის ზედა პალატაში.
მერცი ამტკიცებდა, რომ მიგრაციის შესახებ გადაწყვეტილებები ახლა საჭიროა, მიუხედავად იმისა, ვინ უჭერს მხარს მათ. გერმანიის საგარეო საქმეთა მინისტრმა, ანალენა ბერბოკმა დაადანაშაულა მერცი იმაში, რომ არ იცავდა დემოკრატიას პარტიასთან „ალტერნატივა გერმანიისთვის“ მუშაობის არჩევისას. საკამათო შუამდგომლობა მხარს უჭერს საზღვრის მუდმივ კონტროლს ყველა მეზობელ ქვეყანასთან და ხალხის უკან დაბრუნებას საზღვრებიდან, მაშინაც კი, თუ ისინი თავშესაფარს ითხოვენ.
გერმანული მედიის ინფორმაციით, ქვეყანაში ჩატარებული გამოკითხვების თანახმად, გერმანიის მოსახლეობის დიდი უმრავლესობა მიგრაციული პოლიტიკის გამკაცრების მომხრეა. თუმცა თანაბრად დიდი უმრავლესობა ასევე ეწინააღმდეგება, რომ რომელიმე პოლიტიკურმა პარტიამ კოალიციური შეთანხმება დადოს პარტიასთან „ალტერნატივა გერმანიისთვის“. გამოკითხვების თანახმად, „ქრისტიან-დემოკრატიულ კავშირს“ ამომრჩევლების 30 პროცენტი უჭერს მხარს და ფრიდრიხ მერცს აქვს კარგი შანსი, გახდეს ქვეყნის შემდეგი კანცლერი. „ალტერნატივა გერმანიისთვის“ დაახლოებით 20 პროცენტით მეორე ადგილზეა.