ვენესუელამ ექვსი ამერიკელი პატიმარი გაათავისუფლა. როგორც „ბიბისი“ წერს, „პრეზიდენტ ნიკოლას მადუროსა და დონალდ ტრამპის ადმინისტრაციის მაღალჩინოსანს, რიჩარდ გრენელს შორის გამართული მოლაპარაკებების შემდეგ პატიმრები გათავისუფლდნენ“.
ინფორმაცია პატიმრების გათავისუფლების შესახებ დონალდ ტრამპმა და რიჩარდ გრენელმა სოციალური მედიის საშუალებით გაავრცელეს. გრენელმა თვითმფრინავში გადაღებული ექვსივე გათავისუფლებული პატიმრის ფოტო გამოაქვეყნა და აღნიშნა, რომ ისინი უკვე ტელეფონით პრეზიდენტ ტრამპს ესაუბრნენ.
მოგვიანებით, ასევე სოციალური ქსელით, განცხადება გაავრცელა დონალდ ტრამპმა. მან გრენელი შეაქო და განაცხადა, რომ ის მძევლებს სახლში აბრუნებს.
ცნობისთვის, იანვარში ვენესუელამ განაცხადა, რომ „დაქირავებული მებრძოლების“ ჯგუფი დააკავა, რომელთა შორისაც ამერიკის მოქალაქეებიც იყვნენ.
ტრამპის წარმომადგენლისა და ნიკოლას მადუროს შეხვედრის შემდეგ მადურომ აღნიშნა, რომ იგი აშშ-თან ორმხრივ ურთიერთობებში ახალ დასაწყისს ეძებს. ამასთან, თეთრი სახლის პრესმდივანმა, კეროლაინ ლევიტმა პარასკევს განაცხადა, რომ გრენელის ვიზიტი არ ნიშნავს აშშ-ის მიერ მადუროს ვენესუელის ლეგიტიმურ ლიდერად აღიარებას.