კონგოს დემოკრატიულ რესპუბლიკაში დაპირისპირებას ბოლო ერთ კვირაში 700-ზე მეტი ადამიანი ემსხვერპლა, 2 800 კი დაშავდა.
დასავლური მედიის ინფორმაციით, რუანდისგან მხარდაჭერილმა ამბოხებულთა დაჯგუფება „ემ23“-მა, ქვეყნის აღმოსავლეთში ჩრდილოეთ კივუს პროვინციის ქალაქი გომა დაიკავა და სამხრეთ კივუს პროვინციის ქალაქ ბუკავუს მიმართლებით გადაადგილდება.
გაერო-ს მონაცემებით, კონგოს დემოკრატიულ რესპუბლიკაში ასევე იმყოფებიან „რუანდის თავდაცვის ძალები“.
არსებული ინფორმაციით, სამხედრო კონტინგენტი 4 000 ჯარისკაცისგან შედგება.
რუანდა ამბოხებულების მხარდაჭერას უარყოფს, მაგრამ გაერო ოფიციალურ კიგალის მოუწოდებს, გაიყვანოს სამხედრო ძალები. კონგოს დემოკრატიული რესპუბლიკა რუანდას მინერალების ხელში ჩაგდების მცდელობაში ადანაშაულებს. რუანდა ამ ბრალდებას უარყოფს და ამბობს, რომ მისი მთავარი მიზანია „ჰუტუს“ მებრძოლებისგან შედგენილი დაჯგუფების განადგურება, რომელიც ჩამოყალიბდა 1994 წელს რუანდის გენოციდის შემდეგ.
სამხრეთ აფრიკის განვითარების საზოგადოების (SADC) ლიდერებმა იმბაბვეში კრიზისული მოლაპარაკებები გამართეს. რეგიონულმა ბლოკმა კიდევ ერთხელ დაადასტურა თავისი „სოლიდარობა და ურყევი ვალდებულება, გააგრძელოს კონგოს დემოკრატიული რესპუბლიკის მხარდაჭერა მისი დამოუკიდებლობის, სუვერენიტეტის და ტერიტორიული მთლიანობის დაცვაში“.
დასავლური მედიის შეფასებით, „ემ23“ 100-ზე მეტი შეიარაღებული ჯგუფისგან შედგება, რომლებიც კონგოს მინერალებით მდიდარ აღმოსავლეთში კონტროლის დამყარებას ცდილობს. ეს მინერალები გადამწყვეტი მნიშვნელობისაა მსოფლიოს ტექნოლოგიის დიდი ნაწილისთვის.
