თეთრ სახლში განაცხადეს, რომ რუსეთში დაკავებული ამერიკელი მასწავლებელი, მარკ ფოგელი გათავისუფლებულია.
ამერიკული მხარის ცნობით, ფოგელი, რომელიც 2021 წელს რუსეთში დააკავეს და მოგვიანებით ნარკოტიკების კონტრაბანდის ბრალდებით გაასამართლეს, აშშ-ში ბრუნდება „გაცვლის“ ფარგლებში. თუმცა, ჯერჯერობით უცნობია, ვის გაათავისუფლებს აშშ სანაცვლოდ.
„პრეზიდენტი დონალდ ტრამპი და მისი სპეციალური წარმომადგენელი, სტივ უიტკოფი აცხადებენ, რომ უიტკოფი რუსეთის საჰაერო სივრცეს მარკ ფოგელთან ერთად ტოვებს – ამერიკელთან, რომელიც რუსეთში დააკავეს. პრეზიდენტი ტრამპი, სტივ უიტკოფი და პრეზიდენტის მრჩევლები აწარმოებდნენ მოლაპარაკებებს გაცვლის შესახებ, რაც რუსული მხარის კეთილი ნების დემონსტრირებაა და იმაზე მიანიშნებს, რომ ჩვენ სწორი მიმართულებით მივდივართ, რათა დავასრულოთ სასტიკი და საშინელი ომი უკრაინაში“, – განაცხადა ეროვნული უსაფრთხოების საკითხებში ტრამპის მრჩეველმა, მაიკ უოლცმა.