რუსეთიდან გათხევადებული ბუნებრივი აირის იმპორტი ევროკავშირის ქვეყნებში 2024 წელს წლიურ ჭრილში 18%-ით გაიზარდა. მოსკოვმა იანვრიდან ნოემბრამდე პერიოდში, სულ მცირე, 6.3 მილიარდი ევრო მიიღო. ამის შესახებ ამერიკული „ენერგეტიკისა და ფინანსური ანალიზის ინსტიტუტის“ წერს.
ანალიტიკოსების მონაცემებით, საფრანგეთი, ესპანეთი და ბელგია რჩებიან რუსული გათხევადებული ბუნებრივი აირის უმსხვილეს მიმღებებად ევროპაში. ამ ქვეყნებზე მოდის რუსეთიდან საწვავის იმპორტის 85%. როგორც „ენერგეტიკისა და ფინანსური ანალიზის ინსტიტუტი“ წერს, მხოლოდ საფრანგეთის დიუნკერკის ტერმინალმა გასულ წელს რუსეთიდან ევროპაში მიწოდებული გათხევადებული აირის საერთო რაოდენობის 27% მიიღო.
ექსპერტები აღნიშნავენ, რომ საფრანგეთი რუსულ გაზს მთლიანად საკუთარი საჭიროებისთვის არ იყენებს. მათი თქმით, ხდება ბუნებრივი აირის გათხევადებული მდგომარეობიდან აირად მდგომარეობაში დაბრუნება და მიეწოდება მილსადენებში შემდგომი ტრანსპორტირებისა ან გაყიდვისთვის.
„ენერგეტიკისა და ფინანსური ანალიზის ინსტიტუტის“ გათვლებით, რუსული გათხევადებული ბუნებრივი აირი შეადგენს საფრანგეთში გათხევადებული საწვავის მთლიანი იმპორტის მესამედს, რაც ანალიტიკოსების თქმით, ხელს უშლის ევროკომისიის დასახული მიზნის მიღწევას, რომ ევროკავშირი 2027 წლამდე სრულად გათავისუფლდეს რუსულ გაზზე დამოკიდებულებისგან.