პარლამენტის ევროინტეგრაციის კომიტეტის თავმჯდომარის, ლევან მახაშვილის თქმით, ოპოზიციის წარმომადგენლების მხრიდან დეპრესიული განცხადებები არ უკვირს, რადგან არ იმუშავა მათმა მცდელობამ, ქვეყნის შიგნით თუ გარეთ გაეჩინათ კითხვები არჩევნების ლეგიტიმაციასთან დაკავშირებით და დღეს ყველა ინსტრუმენტი ხელიდან ეცლებათ.
მახაშვილმა კომენტარი გააკეთა „გირჩი – მეტი თავისუფლების“ ლიდერის, ზურაბ ჯაფარიძის პოსტზე, სადაც ჯაფარიძე აღნიშნავს: „დროის გასვლასთან ერთად, ქვეყანაში დარჩება ბრძოლის სულ უფრო ნაკლები რესურსი, დრო ჩვენზე არ მუშაობს და ამიტომ რუსთაველი ყოველდღე არის უმნიშვნელოვანესი“.
„ეს განცხადება არ მინახავს, მაგრამ ფაქტი ფაქტად რჩება. რამდენიმეთვიანი მცდელობის მიუხედავად, შიგნით თუ გარეთ გაეჩინათ კითხვები არჩევნების ლეგიტიმაციასთან დაკავშირებით, ფაქტია, რომ ამან არ იმუშავა და დარჩათ მხოლოდ რამდენიმე სახელმწიფოღა, რომლის უკან, კიდევ ერთხელ, დგანან ის ძალები, რომლებიც თავის დროზე, ბაიდენის ადმინისტრაციასთან ერთად, ამ ქსელის მონაწილეები იყვნენ. მათი რამდენიმე ხელისუფლების გარდა, აღარ დარჩა რეალური რესურსი და ფაქტია, იმასაც ვხედავთ, რომ ყოველდღიურად ეცლებათ ყველა ის ინსტრუმენტი, რაც მანამდე ჰქონდათ. ამიტომ არ მიკვირს ეს განცხადებები, ერთგვარი დეპრესიული განცხადებები, რომ, აგერ, არმაგედონი გვემუქრება.
საბოლოო ჯამში, ჩვენი აზრით, მაინც ყველაფრის პასუხი იქნება, თუ ისინი მიიღებენ მონაწილეობას ადგილობრივი თვითმმართველობის არჩევნებში და რეალურად გამოჩნდება საზოგადოებაში, მათ რა მხარდაჭერა აქვთ. ბევრი მოვისმინეთ ხმამაღალი, ბრტყელ-ბრტყელი განცხადებები საზოგადოების მხარდაჭერაზე და ა.შ. თუ ვინმეს აქვს პრეტენზია საქართველოში, რომ პოლიტიკაში წარმოადგენს რაიმეს და წარმოადგენს საქართველოს მოსახლეობის რომელიმე სეგმენტის ინტერესს, ყველაფერზე ლეგიტიმური პასუხი იქნება არჩევნებში მონაწილეობა და ამით დანახვება მოსახლეობისთვისაც, რომ ისინი რეალურად წარმოადგენენ მათ ინტერესებს“, – აღნიშნა ლევან მახაშვილმა.