„ნანუკას ფონდის“ დაყადაღების ფაქტს პარტია „ხალხის ძალის“ წევრი თამარ ჩიბურდანიძე სოციალური ქსელით ეხმიანება და წერს, რომ ქართული დემოკრატიის „მცველებში“ ფონდის დაყადაღებამ მღელვარება გამოიწვია.
„2012 წელს ბიძინა ივანიშვილმა თქვა, დემოკრატიის ხარისხით თვით დასავლეთს გავაოგნებთო. მაშინ ბევრმა გაიღიმა ამაზე, თუმცა მიმდინარე შედეგებიდან გამომდინარე, ირონიული ღიმილი სახეზე შერჩათ. მიუხედავად დადებითი მხარისა, დღეს საქართველოში თავისუფლების ის ხარისხია, რაც კანონდარღვევაში გადადის უკვე და სამოქალაქო საზოგადოება „თავისუფლების“ მანტიით დამნაშავე სექტორად ყალიბდება. ნანუკა ჟორჟოლიანის ფონდის დაყადაღებამ მღელვარება გამოიწვია ქართული დემოკრატიის „მცველებში“. კაია კალასს ჯერ ამაზე განცხადება არ გაუკეთებია, თუმცა, ველით! მე კი ის მაინტერესებს, რამდენი დღე იარსებებდა ევროკავშირის ქვეყნებში ისეთი ფონდი, რომელიც ღიად და დაუფარავად აფინანსებდა კანონდარღვევას და რევოლუციას ქვეყანაში? იქნებ ევროლიდერებმა ამაზეც გაგვცენ პასუხი. თუ ევროპული სტანდარტები მათთვის სხვაა და ჩვენთვის „უკეთესი“ უნდათ?
ამ თვეების განმავლობაში ქართველი ხალხის უმეტესობა ხშირად სვამდა კითხვას სწორედ „ნანუკას ფონდზე“. ნუთუ შესაძლებელია ქვეყანაში ასე ღიად მოუწოდო ხალხს რევოლუციისკენ, არეულობისკენ, კანონდარღვევისკენ და თან ეს ღიად დააფინანსო? ჩვენ ამ კითხვებზე პასუხი არ გვქონდა. კარგია, რომ დღეს სახელმწიფო თავად სცემს პასუხს ხალხის კრიტიკულ კითხვებს“, – წერს თამარ ჩიბურდანიძე.