ჩვენ ვართ ვალდებულები, რომ, ასე ვთქვათ, პოლიტიკური ველი ასეთი მავნებელი პარტიებისგან გავწმინდოთ, რომლებიც ცუდის მეტს არაფერს არ აკეთებენ ჩვენი ქვეყნისთვის, – ასე გამოეხმაურა საპარლამენტო ფრაქცია „ქართული ოცნების“ თავმჯდომარის მოადგილე ლევან მაჭავარიანი მამუკა მდინარაძის განცხადებას, რომელმაც გუშინ ბრიფინგზე თქვა, რომ მმართველი გუნდი „ნაციონალური მოძრაობისა“ და მისი სატელიტების არაკონსტიტუციურად გამოცხადებას აპირებს.
„რა თქმა უნდა, როდესაც პოლიტიკური ველი გათავისუფლდება ასეთი პარტიებისგან, რომლებიც მთლიანად გარე ძალებს ემსახურებიან და ასობით მილიონი დოლარით ფინანსდებიან ამის გამო, იქ უკვე გაჩნდება რეალური ოპოზიცია. შესაძლებლობას მივცემთ მათ, ვინც ჩვენი ქვეყნის რეალური პატრიოტები იქნებიან, რეალური ოპოზიცია წარმოადგინონ პოლიტიკურ ველზე“, – აღნიშნა მაჭავარიანმა.
„ქართული ოცნების“ აღმასრულებელმა მდივანმა და საპარლამენტო უმრავლესობის ლიდერმა მამუკა მდინარაძემ პარლამენტში გამართულ ბრიფინგზე განაცხადა:
„მოგეხსენებათ, კოლექტიური „ნაციონალური მოძრაობის“ ანტიკონსტიტუციურად გამოცხადება ჩვენი წინასაარჩევნო დაპირებაც იყო. უკვე აშკარაა, რომ პარლამენტის დროებითი საგამოძიებო კომისიის დასკვნა მოგვცემს მყარ საფუძველს, მივმართოთ საქართველოს საკონსტიტუციო სასამართლოს „ნაციონალური მოძრაობის“ და მისი სატელიტი პარტიების არაკონსტიტუციურად გამოცხადებასთან დაკავშირებით“.