მოლდოველმა სამართალდამცველებმა ქვეყნის ეთნიკური უმცირესობით დასახლებული რეგიონის, გაგაუზიის ხელმძღვანელი, ევგენია გუცული დააკავეს. ინფორმაციას Reuters-ი ავრცელებს.
გუცულის დაკავება კიშინიოვის აეროპორტში მოხდა. ის მოლდოვის ანტიკორუფციულმა ცენტრმა დააკავა. „ღონისძიება სისხლის სამართლის საქმის ფარგლებში ტარდება“, – ციტირებს სააგენტო ანტიკორუფციული ცენტრის წარმომადგენელს, ანჟელა სტარინსკაიას.
მოლდოვური მედიის ინფორმაციით, დღეს სასამართლო სხდომა გაიმართება, სადაც პროკურატურა გუცულისთვის 30-დღიან პატიმრობას მოითხოვს. ამასთან ერთად, გაგაუზიის მაცხოვრებლები კიშინიოვში მიემგზავრებიან, რათა მათი ავტონომიის დაკავებულ ხელმძღვანელს თანადგომა გამოუცხადონ.
ცნობისთვის, გუცული მოლდოვის რუსეთთან დაახლოების მომხრეა. ის რამდენჯერმე იყო ჩასული მოსკოვში და რუსეთის პრეზიდენტს, ვლადიმერ პუტინს შეხვდა.