უკრაინის უმაღლესი რადის დეპუტატებმა აშშ-თან წიაღისეულის შესახებ მოსაწერი ხელშეკრულების გამო პარლამენტის სხდომა ჩაშალეს. ინფორმაციას უკრაინელი დეპუტატი ალექსეი გონჩარენკო „ტელეგრამის“ საკუთარ არხზე ავრცელებს.
მისი თქმით, არეულობა სხდომაზე მას შემდეგ დაიწყო, რაც დეპუტატმა იაროსლავ ჟელეზნიაკმა მოხსენება წაიკითხა, სადაც მკვეთრად გააკრიტიკა ამერიკასთან დასადები ხელშეკრულება.
ამის შემდეგ დეპუტატების ნაწილი სპიკერის ტრიბუნასთან ავიდა და მას სხდომის გაგრძელების საშუალება არ მისცა. მოგვიანებით უმაღლესი რადის სპიკერმა, რუსლან სტეფანჩუკმა შესვენება გამოაცხადა და სხდომა შეწყვიტა.
ცნობისთვის, ჟელეზნიკმა გუშინ „ტელეგრამის“ საკუთარ არხზე წიაღისეულის შესახებ შეთანხმება გააკრიტიკა. მან აღნიშნა, რომ დოკუმენტი უკრაინისთვის არის ცუდი. ის გარდა იშვიათი წიაღისეულისა ეხება ნავთობსა და გაზსაც. როგორც უკრაინის უმაღლესი რადის დეპუტატი წერს, შეთანხმება წიაღისეულის შესახებ აშშ-სა და უკრაინას შორის იქნება უვადო და უსაფრთხოების არავითარ გარანტიებს არ გულისხმობს. წიაღისეულის მოპოვების შედეგად მიღებული ფული უკრაინის ფარგლებს გარეთ გაედინება.