იშვიათი წიაღისეულის შესახებ ახალი შეთანხმება აშშ-ის პრეზიდენტის, დონალდ ტრამპის მხრიდან უკრაინის დამცირების მორიგი მცდელობაა. სტატიას ამ სათაურით The Times-ი ავრცელებს.
გამოცემის ცნობით, ხელმოსაწერი შეთანხმება მიზნად ისახავს უკრაინის ბუნებრივი რესურსების მთლიანად ხელში ჩაგდებას.
როგორც The Time-ი წერს, უკრაინელმა ჩინოვნიკებმა უკვე დაგმეს აშშ-ის ახალი მოთხოვნები. მათი აზრით, ახალი შეთანხმება მკვეთრად განსხვავდება ძველისგან და უკრაინას პრაქტიკულად ვასალურ ქვეყნად აქცევს.
„მიუხედავად იმისა, რომ მოსკოვი უკრაინაში სამხედრო მოქმედებების შეწყვეტის ნიშნებს არ ავლენს, ამერიკელი მომლაპარაკებლები, როგორც ჩანს, ცდილობენ კიევისგან უფრო მეტი დათმობა მიიღონ“, – წერს გამოცემა.
გამოცემა აღნიშნავს, რომ ტრამპის ადმინისტრაციის ასეთი მიდგომა გასაკვირი არ უნდა იყოს, რადგან მისი გაპრეზიდენტების პირველივე დღეებში მან განაცხადა, რომ თეთრ სახლში ის პირველად იმ ადამიანს მიიღებს, ვინც მას მეტ ფულს გადაუხდის.
მისი პოლიტიკის მთავარ ხაზს ტარიფების შემოღება წარმოადგენს, როგორც მეგობრებისთვის, ისე მოწინააღმდეგეებისთვის. ეს ნაკარნახებია იმით, რომ, ტრამპი ფიქრობს, რომ დანარჩენი სამყარო, ევროპის ჩათვლით „წლობით ჩვენ გვყვლეფდა“.