აშშ-ის ვიცე-პრეზიდენტის მიერ გრენლანდიაში გაკეთებულ განცხადებებს „ფეისბუქით“ დანიის პრემიერი-მინისტრი გამოეხმაურა.
მეტე ფრედერიკსონმა ჯეი დი ვენსის მიერ დანიის შესახებ გაკეთებულ შეფასებას მცდარი უწოდა, თუმცა, აღნიშნა, რომ საფრთხეები, რომლებიც მან დაასახელა, მართლაც არსებობს და ეთანხმება მოსაზრებას, რომ უსაფრთხოებას გრენლანდიაში მაღალი პრიორიტეტი უნდა მიენიჭოს.
„დანია კარგი და ძლიერი მოკავშირეა ნატოს ყველა წევრისთვის. რუსეთის მხრიდან საფრთხის არსებობის ფონზე, დანიამ მნიშვნელოვნად გაზარდა თავდაცვის ხარჯები. წლების განმავლობაში ჩვენ რთულ სიტუაციებში აშშ-ის გვერდით ვიდექით, ამიტომაც ვიცე-პრეზიდენტის მხრიდან დანიის ასეთი დახასიათება სწორი არ არის. მეორე მხრივ, მართალია, რომ არქტიკაში უსაფრთხოებას მეტი ყურადღება უნდა მიექცეს. ამიტომაც დანია აძლიერებს ძალისხმევას. ჩვენ შევძლებთ უფრო სწრაფად გავაძლიეროთ უსაფრთხოება, თუკი შევძლებთ საჭირო მიწოდების მიღებას აშშ-დან. გრენლანდია ნატოს ნაწილია და ამიტომაც საჭიროა, რომ ნატომ მნიშვნელოვნად გაზარდოს თავისი ყოფნა არქტიკაში“, – განაცხადა ფრედერიკსონმა.