საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი მიხეილ სარჯველაძე თურქმენეთში ოფიციალური ვიზიტით იმყოფება. ინფორმაციას ჯანდაცვის სამინისტრო ავრცელებს.
უწყების ცნობით, მინისტრი მონაწილეობს საერთაშორისო კონფერენციაში „მშვიდობისა და ნდობის წელი: საერთაშორისო ქმედებების განვითარება ბავშვებისთვის“, რომელიც მიზნად ისახავს ბავშვების კეთილდღეობის გაუმჯობესებასა და საერთაშორისო თანამშრომლობის გაძლიერებას.
„ვიზიტის ფარგლებში მიხეილ სარჯველაძე მეცნიერების, ჯანმრთელობის, განათლების, სპორტისა და საზოგადოებრივ საქმეთა საკითხებში თურქმენეთის ვიცე-პრემიერს, ბაირამგულ ორაზ დურდიევას, ასევე ჯანმრთელობისა და სამედიცინო მრეწველობის მინისტრს, მირატ მამედოვს შეხვდა.
მიხეილ სარჯველაძემ თურქმენელ კოლეგებს ჯანმრთელობის სისტემის გაძლიერებისა და ხელმისაწვდომობის გაუმჯობესების მიმართულებით საქართველოში მიმდინარე რეფორმები გააცნო. განიხილეს ორ ქვეყანას შორის ჯანდაცვის მიმართულებით არსებული თანამშრომლობა, გამოცდილების გაზიარების, ერთობლივი პროექტებისა და სამომავლო თანამშრომლობის პერსპექტივები.
შეხვედრას საქართველოს საგანგებო და სრულუფლებიანი ელჩი თურქმენეთში კონსტანტინე საბიაშვილი და საელჩოს უფროსი მრჩეველი ანდრო კაჭკაჭიშვილი ესწრებოდნენ“, – აღნიშნულია ჯანდაცვის სამინისტროს ინფორმაციაში